Mikið fjör á sviðinu þegar allir kveða saman

Systurnar Gréta Petrína Zimsen, sjö ára, og Iðunn Helga Zimsen, tíu ára, eiga það sameiginlegt að elska að kveða eins og fram kemur í nýjasta hefti Stuðlabergs, tímarits um hefðbundna ljóðlist. Þær voru til í smá viðtal um þetta áhugamál og það var líka bróðir þeirra, Jóhannes Jökull Zimsen, sem er fjögurra ára.

En hvað er að kveða? „Það er alveg eins og að syngja, nema það kemur öðruvísi tónn,“ svarar Gréta Petrína. „Það er þegar lóan er komin,“ segir Jóhannes Jökull. Iðunn Helga á lengstu útskýringuna: „Að kveða er næstum því eins og söngur og svo þarf að setja saman orð og láta þau ríma saman. Svo flytur maður rímur sem eru oft margar vísur saman.“

Hún kveðst hafa lært að kveða af foreldrum sínum, Helga Zimsen og Rósu Jóhannesdóttur, sem séu í Kvæðamannafélaginu Iðunni. Jóhannes Jökull bendir á að hún heiti Iðunn eins og félagið.

Sjálf sækja þau alltaf fundina í kvæðamannafélaginu eftir að þau komust á bragðið. Hvað er skemmtilegast við það? „Það sem gerist!“ segir Gréta Petrína með áherslu. „Við förum upp á sviðið, því langar mig aldrei að missa af, það er svo mikið fjör á sviðinu þegar allir kveða saman. Stundum kveð ég ein fyrir alla á fundinum.“

Iðunn Helga tekur undir orð systur sinnar. „Þegar allir kveða saman, þá er æðislegt. Það er líka smitandi. Ef einhver byrjar þá hoppa þeir inn í sem eru að hlusta, þeir geta ekki ráðið við sig.“

Jóhannes Jökull segist kveða hjá ömmu og afa. „Já, og líka í bílnum,“ bætir Gréta Petrína við. „Stundum erum við líka heima að æfa okkur.“

Systurnar eru í Kórskóla Langholtskirkju en hafa þær reynt að kenna öðrum krökkum að kveða? „Ég fór með mömmu til Akureyrar nýlega á þjóðlistahátíð sem heitir Vaka og þar kenndum við stemmur, vísur og rímur,“ upplýsir Gréta Petrína og Iðunn Helga kveðst hafa kennt bekknum sínum stemmur og vísur eftir pabba sinn sem voru fluttar á þorrablóti í skólanum. „Ég hef kveðið fyrir krakkana á leikskólanum mínum sem heitir Furuborg,“ segir Jóhannes Jökull.

Börnin eiga sér uppáhaldsstemmur og öll hafa þau komið fram sem skemmtikraftar, Gréta Petrína til dæmis á Þjóðlagahátíðinni á Siglufirði, á Hólahátíð, í Heiðmörk og á Akureyri.

„Svo höfum við kveðið á Landsmóti kvæðamanna á Egilsstöðum, fyrir vini í Noregi og líka á dans-,­ hljóðfæra- og kvæðamóti sem haldið er í Noregi á hverju ári,“ segir Iðunn Helga. „Og fyrir Grím frænda minn sem á afmæli 17. júní,“ botnar Jóhannes Jökull.