Undirbúa málsókn vegna losunar hafta

Bandarískir vogunarsjóðir undirbúa nú málsókn á hendur íslenska ríkinu vegna laga um aflands­krónaúboð. Þeir vilja láta reyna á hvort lögin standist stjórnarskrá og hafa farið fram á við héraðsdóm að dómkvaddir verði tveir óvilhallir matsmenn til að meta lögmæti laganna. Brynjar Níelsson, þingmaður Sjálfstæðisflokks og fyrsti varaformaður efnahags- og viðskiptanefndar, telur þessar hugmyndir þvælu.

Fyrr í mánuðinum hélt Seðlabanki Íslands aflandskrónaútboð þar sem eigendum var boðið að losa sig út á ákveðnum kjörum. Gátu þeir keypt evrur fyrir um 190 krónur á hagstæðasta verðinu en gengi evru í dag er undir 140 krónum. Með útboðinu náði Seðlabankinn inn rúmum sjötíu milljörðum króna og greiddi fyrir þær andvirði tæpra fimmtíu milljarða.

„Ég hef engar áhyggjur af þessum vangaveltum,“ segir Brynjar. „Þeir eru hvort heldur sem er búnir að vera í höftum og fengu að fara út með vextina sína sem Íslendingar hafa ekki fengið. Ef þetta er ólöglegt þá hafa höftin verið ólögleg allan tímann.“ Málshöfðunin sé einhver þvæla. „Það er ekki gengið lengra en nauðsyn krefur, fyrir lögunum eru málefnaleg sjónarmið, meðalhóf virt og þetta er liður í losun hafta.“

Pétur Örn Sverrisson, lögmaður vogunarsjóðanna, segir umbjóðendur sína telja aðgerðir stjórnvalda harkalegar, þær gangi gegn eignarréttarákvæði stjórnarskrárinnar og séu í reynd eignaupptaka. 

„Við höfum komið á framfæri hugmyndum um sanngjarnari leið sem myndi ná sömu markmiðum stjórnvalda. Ekki hefur verið hlustað á þær hugmyndir. Við áréttum að engum hefur verið stefnt enn þá en það er fyrsta skrefið hjá okkur að fá dómkvadda matsmenn að borðinu áður en lengra er haldið,“ segir Pétur. Hann telur einnig að málið muni ekki hafa áhrif á áætlun stjórnvalda um afnám hafta.

Brynjar segir málaferli hins vegar geta sett strik í reikninginn. „Það gæti alveg tafið ferlið eitthvað. Nú, ef þeir ynnu mál í framhaldinu þá verður höftum bara ekkert aflétt, það er bara þannig.“