Fundu afklipptar táneglur af Jónasi Hallgrímssyni

Ýmissa grasa kennir í geymslum Þjóðminjasafnsins en nýverið birti safnið myndband á Facebook-síðu sinni þar sem gægst er ofan í kassa sem tilheyrir greinilega Jónasi nokkrum Hallgrímssyni.

„Það er alltaf skemmtilegast þegar það eru einhverjar sögur á bakvið hluti. Stundum skiptir ekki máli hvort sagan sé sönn eða ekki, bara að það sé góð saga. Þetta er svona dæmi um það,“ útskýrir Freyja Hlíðkvist sérfræðingur Munasafns Þjóðminjasafnsins í myndbandinu sem sjá má hér að neðan. 

Jónas Hallgrímsson er líklega ástsælasta skáld þjóðarinnar og þekktasti maðurinn með sínu nafni hér á landi. Hins vegar hefur Jónas átt fjölmarga alnafna í gegnum tíðina og því er engin leið að segja til um hvort kassinn hafi raunverulega verið eign skáldsins. 

Allskonar muni má finna í kassanum sem er sérstaklega merktur með nafni Jónasar Hallgrímssonar. Stígvél, skinnskór og sitthvað fleira. En það sem sérfræðingur Munasafnsins tók sérstaklega eftir var lítill eldspýtnastokkur sem geymir, ekki eldspýtur heldur, afklipptar táneglur.

Þjóðminjasafnið ályktar í glettnislegu myndbandi sínu sem svo að skáldið hafi klippt neglur sínar og geymt í eldspýtnastokki. 

„Auðvitað er sagan best þannig að þetta séu neglur af Jónasi Hallgrímssyni,“ segir Freyja Hlíðkvist réttilega.