Mildi að flugmaðurinn slapp

Mikil mildi þykir að ungur flugmaður sem brotlenti í sjónum í Leiruvogi við Mosfellsbæ í dag hafi ekki stórslasast en sjónarvottur segir vélina hafa farið lóðrétt niður í sjóinn stutt frá tanga þar sem hún hefði lent, enn harkalegar á landi.  

Óð sjó upp að mitti

Vélin fór niður um hálfþrjúleytið í dag og ekki er enn ljóst hvað olli brotlendingunni sem varð um hundrað metrum frá golfvellinum við Mosfellsbæ og vélin því nærri lent enn harkalegar á skeri. Flugmaðurinn meiddist ekki alvarlega og komst sjálfur út úr vélinni. Tveir sjónarvottar komu honum til aðstoðar. 

Var greinilega í vandræðum  

Gylfi Geir Gunnarsson, sem er annar þeirra, segir að vélin hafi flogið mjög lágt við sjóinn.

„Flugmaðurinn er að taka vinstri beygju að tanganum hér út eftir og stýrir vængjunum að manni sýnis lóðrétt þannig að vinstri vængurinn skellur í sjónum og hann tekur svo bara handahlaup og endar þarna úti í sjó. Hann var að taka svona u-beygju aftur út í fjörðinn. Ég sá ekki alveg úr hvaða átt hann var að koma en hann var greinilega í einhverjum vandræðum þarna og alveg ótrúlega nálægt sjónum,“ sagði Gylfi í fréttum Stöðvar tvö í kvöld. 

Var nokkuð lemstraður

Gylfi og annar maður sem var að spila golf á vellinum við sjóinn komu flugmanninum til hjálpar.

„Við hlaupum þarna úteftir að tanganum og sjáum að hann er eitthvað að vesenast við vélina og við höfðum áhyggjur af því að hann væri kannski ekki einn á ferð. En sem betur fer kemur hann svo í átt að okkur, vaðandi sjóinn upp að mitti. Þá erum við nokkuð vissir um að hann sé bara einn.

Við reynum að kalla á hann en getum það ekki vegna mótvinds og við náum ekki sambandi en svo kemur hann og segist vera einn og var eitthvað lemstraður og blóðugur á hægri öxl og höndinni.“

Heppinn að koma labbandi frá brakinu

Gylfi segir unga flugmanninn, sem er nítján ára, hafa verið mjög skelkaðan.

„Hann fékk að hringja í föður sinn og láta hann vita að vélin væri í sjónum. Mér fannst það vera hans aðal áhyggjuefni. En hann var bara heppinn að koma labbandi frá þessu að mér sýnist", segir Gylfi, en samkvæmt heimildum fréttastofu á faðir flugmannsins vélina.

„Ég hefði haldið að það væri betri kostur að hann lenti þar sem hann lenti heldur en að fara á tangann rétt hjá. þá hefði ekki þurft að spyrja að leikslokum held ég,“ segir Gylfi ennfremur og að vélin hefði lent algerlega lóðrétt í sjóinn.  

Vélin illa farin

Vélin, sem er tveggja sæta úr krossvið og dúk, er létt og með 95 hestafla mótor. Hún er af gerðinni TF-REX Jodel, árgerð 1960. Og líkast til var þetta síðasta flugferðin.