Kveikjur sem innhalda ögrandi viðfangsefni

„Aðalkveikjan að þessari bók er fyrst og fremst löngun mín til þess að bjóða upp á stuttar textamyndir, siðferðissögur úr samtímanum, sem fela í sér spurningar og vangaveltur er hafa ekki verið mjög áberandi í umræðunni,“ segir séra Bolli Pétur Bollason, sóknarprestur í Laufásprestakalli.

Hann sendi frá sér bókina Kveikjur fyrir skömmu. Um er að ræða fjörutíu frumsamdar kveikjur, frásagnir með dæmisagnablæ. Þar má finna umfjöllun um fátækt, einelti, líffæragjafir, fóstureyðingar, fordóma, ofbeldi, trúnaðarbrot, náungaábyrgð, sorg, einmanaleika, samtal kynslóða, andríkar hugmyndir, náttúruvernd, trú, von, kærleika, tímann og endalokin.

„Þessar stuttu sögur nefnast einu orði Kveikjur vegna þess að þeim er ætlað að kveikja frekari hugmyndir og umræður um siðferðisleg álitamál, þjóðfélagsmein, lífsins tilgang, Guð. Kveikjurnar innihalda ögrandi viðfangsefni sem skilja eftir margvíslega þanka og því gott og mikilvægt að fullorðnir ræði þær við ungmenni,“ segir Bolli Pétur.

Kveikjurnar eru eins fjölbreyttar og þær eru margar en Bolli Pétur nýtir reynslu sína úr starfi sem úr leik við kveikjusmíðina. „Þetta er skáldskapur en reynsla mín kemur vissulega þarna fram í ýmsum myndum.“ Bolli Pétur var eitt ár að vinna bókina sem gefin er út af Bókaútgáfunni Hólum ehf. Ljósmynd eftir Völund Jónsson blaðaljósmyndara prýðir hverja sögu og þar er um gott verkefni fyrir lesandann að ræða, þ.e. að tengja saman kveikju og mynd í huga sem í samræðu.

Í lok hverrar kveikju eru svo tvær spurningar sem geta komið hugflæði og samtali af stað, svokallaðir ísbrjótar. „Ég vil skapa umræðugrundvöll um kveikjurnar. Kennarar hafa m.a. sýnt bókinni áhuga og er vilji fyrir því að hún sé kennd og nýtt í lífsleiknifræðslu, ég hef trú á þessu efni í slíka fræðslu,“ segir Bolli. „Það er ljóst að margar þessara kveikna eru krefjandi,innihalda viðkvæm efnistök, og svo eru þarna kveikjur sem strjúka jafnframt á vanga og vekja vonir, bjartsýni og trú. Þær kalla á samtal og ekki hvað síst við yngra fólk en bókin höfðar engu að síður til allra aldurshópa, og ég legg áherslu á að þarna sé um kjörið efni fyrir unga og aldna til að ræða sín á milli,“ útskýrir Bolli Pétur.

Bolli hefur fengið jákvæð viðbrögð og umsagnir m.a. frá Gerði Kristnýju rithöfundi og Gunnlaugi A. Jónssyni guðfræðiprófessor og ýmsir aðrir segja bókina eiga fullt erindi og þjóna vel sínum tilgangi.