Virkum í athugasemdum veitt „sakaruppgjöf“

Áramótaheit DV lýtur að því að vanda sig aðeins meira. Þetta kemur fram í leiðara ritstjórans Eggerts Skúlasonar í blaði dagsins. Leiðarinn ber titilinn „Tímamót - DV fer sínar eigin leiðir.“

Eggert segir að DV verði áfram frjálst og óháð blað og netmiðill sama þótt úrtöluraddir netheima „tröllist á öðru“. Þá verði teknar upp nýjar reglur varðandi athugasemdakerfið á DV.is, strangari reglur, í þeim tilgangi að bæta orðræðuna.

„Athugasemdakerfi DV hefur oftar en ekki verið skotspónn þeirra sem telja að umræðan á netinu sé fyrir neðan allar hellur og oft og tíðum ótæk. Auðvitað er það svo að oft er umræðan í þessu kerfi góð og jafnvel málefnaleg.“

Í tengslum við nýjar reglur verður þeim sem bannaðir hafa verið í athugasemdakerfinu leyft að reyna sig á nýjan leik.

„Um leið og reglurnar hafa verið kynntar ætlum við að veita þeim „sakaruppgjöf“ sem bannaðir hafa verið í athugasemdakerfinu, fram til þessa. Með því sitja allir við sama borð og geta tjáð sig og vita þá af nýjum reglum.“