Alþjóðlegur svikari í gæsluvarðhaldi: Grunaður um ítrekuð fjársvik og dreifingu barnakláms

Hæstiréttur hefur staðfest áframhaldandi gæsluvarðhald yfir breska ríkisborgaranum Reece Scobie, sem handtekinn var við komu til landsins þann 16. júní síðastliðinn með umtalsvert magn barnakláms á tölvubúnaði sem hann hafði meðferðis. Samkvæmt því sem kemur fram í gæsluvarðhaldsúrskurði yfir Scobie er hann undir rökstuddum grun um að hafa haft til dreifingar þúsundir mynda og myndbanda sem sýni börn á kynferðislegan eða klámfengin hátt.

Lögreglan á Suðurnesjum hefur einnig til rannsóknar ætluð fjársvik Scobie í farmiðakaupum en hann var upphaflega handtekinn eftir að lögreglu barst ábending um að Scobie væri á leið til Íslands og að farmiði hans hefði verið greiddur með illa fengnu greiðslukortanúmeri. Scobie er einnig grunaður um fjölda fjársvika með fölsuðum greiðslukortum frá því í ágúst, þegar hann var í farbanni en hafði verið látinn laus úr gæsluvarðhaldi.

Handtekinn tvisvar eftir að gæsluvarðhaldi var aflétt

Fréttablaðið greindi frá þeim brotum á sínum tíma, en Scobie var meðal annars handtekinn í verslun iSímans í Skipholti í Reykjavík þann 6. ágúst þar sem hann reyndi að sækja vörur sem hann hafði pantað á netinu fyrir alls 516 þúsund krónur. Eigandi iSímans hafði þá haft samband við lögreglu vegna gruns um að eitthvað væri athugavert við pantanirnar.

Scobie var aftur handtekinn tæpri viku síðar á hóteli í Reykjavík þar sem hann á að hafa reynt að sækja muni sem pantaðir höfðu verið á annað nafn. Scobie hafði bókað gistingu á hótelinu undir því nafni.

Þá segir í gæsluvarðhaldsúrskurðinum að það liggi fyrir að Scobie hafi fengið sendan aðgangskóða að gistiheimili nokkru eftir að hafa bókað þar gistingu án heimildar. Við handtöku hans í ágúst hafi hann svo verið með fartölvu og myndavél í fórum sínum sem hafði verið stolið af umræddu gistiheimili.

„Catch me if you can-glæpamaðurinn“

Scobie er fæddur árið 1993 og hefur áður komið við sögu lögreglu fyrir efnahagsbrot í Bretlandi. Hann fékk árið 2013 16 mánaða dóm í Bretlandi fyrir að svíkja út sjötíu þúsund pund, eða rúmlega fjórtán milljónir íslenskra króna, af ferðaþjónustuaðilum. 

Í frétt breska fjölmiðilsins The Telegraph um málið segir að í dómi sé Scobie lýst sem tæknisérfræðingi sem nýti sér tölvukunnáttu sína til að svíkja út fé. Þá er talað um Scobie sem „Catch me if you can-glæpamanninn“ í breskum miðlum og honum líkt við þekkta svikahrappinn Frank Abagnale Jr.,sem Leonardo DiCaprio lék í bíómyndinni Catch Me If You Can.

Fyrir dóminum liggur skýrsla erlends geðlæknis þar sem fram kemur að Scobie sé með Asberger-heilkenni, athyglisbrest og ofvirkni. Í gæsluvarðhaldsúrskurði Héraðsdóms Reykjavíkur frá því í september segir að skýrslan bendi ekki til ósakhæfis hans.

Í gæsluvarðhaldsúrskurði Héraðsdóms Reykjaness frá því í lok október segir að Scobie sé að mati lögreglu vanaafbrotamaður sem hafi sýnt það í verki að hann muni halda brotum sínum áfram, verði honum ekki gert að sæta gæsluvarðhaldi áfram.

Hann mun sæta gæsluvarðhaldi til fimmtudagsins 5. nóvember.