Bolvíkingar bregðast við bankaflutningi: Vilja þjónustumiðstöð í húsnæðið við Aðalstræti

Bæjarráð Bolungarvíkur samþykkti á fundi sínum í kvöld áætlun um að koma upp þjónustumiðstöð í núverandi húsnæði Landsbankans, sem hyggst loka útibúi sínu þar í bæ. Bæjarstjóra er samkvæmt áætluninni falið að hafa samband við Landsbankann, Íslandspóst og sýslumanninn á Vestfjörðum og óska eftir viðræðum um hugsanlegt samstarf í húsnæðinu.

Húsnæði Landsbankans í Bolungarvík er nú á jarðhæð hússins við Aðalstræti 12 en á efri hæð sama húss eru bæjarskrifstofur Bolungarvíkur og starfsemi á vegum sýslumannsins. Samkvæmt áætluninni verða möguleikar kannaðir á „makaskiptum“ við Landsbankann þannig að bærinn myndi flytja skrifstofur sínar á jarðhæðina. Þar yrði starfrækt þjónustumiðstöð í samstarfi við ofangreinda aðila.

Til stendur að bjóða Landsbankanum að starfa áfram í miðstöðinni og bjóða upp á gjaldkera- og hraðbankaþjónustu auk þjónustu þjónustufulltrúa bankans. Í samþykkt bæjarráðs segir að þjónustu bankans yrði þróuð áfram í sjálfvirkni og sjálfsafgreiðslu þannig að fullrar hagkvæmni væri gætt.

Á efri hæð hússins, þar sem bæjarskrifstofurnar eru nú, kæmi ný starfsemi af einhverjum toga. Í samþykkt bæjarráðs segir að þar verði sérstaklega horft til þess að fá starfsemi á vegum ríkisins í húsið, enda hafi Bolvíkingar „þegar lagt mörg lóð á vogarskálarnar í hagræðingu hjá ríkinu með flutningi starfa úr bæjarfélaginu og eðlilegt að gerð sé krafa um að eitthvað komi þar í staðinn.“