Ronda Rousey komin á fast

Ein besta íþróttakona heims er í sambandi með UFC bardagakappanum Travis Browne. Eftir miklar vangaveltur síðustu misseri staðfesti Browne þetta í dag. Vangavelturnar byrjuðu eftir að Jenna Renee, fyrrverandi eiginkona Browne, sagði Rousey vera með manninum sem lamdi sig.

Ronda „Rowdy“ Rousey er ósigruð á ferli sínum í UFC og hefur unnið tólf bardaga. Þau Rousey og Browne æfa í sömu æfingabúðunum en Brown berst í þungavigtarflokki UFC.

Browne sagði í viðtali í MMA Hour í dag að Rousey væri konan sín og að hann væri maðurinn hennar. Hann sagði ekkert stefnumótastúss vera í gangi, þau væru bara saman.

Orðrómar hafa verið á kreiki frá því í ágúst, eftir að Jenna Renee, fyrrverandi eiginkona Browne, sagði þau vera í sambandi. Hún birti skömmu áður myndir á Instagram þar sem hún sagði Browne hafa gengið í skrokk á sér. Forsvarsmenn UFC fengu utanaðkomandi aðila til að rannsaka ásakanirnar. Niðurstaðan var hins vegar sú að ekki væru nægar sannanir til að halda því fram að heimilisofbeldi hefði átt sér stað.