Innlent

Skógamítlar komnir til að vera

Viktoría Hermannsdóttir skrifar
Fara þarf varlega til þess að fjarlægja skógarmítil af húð. Það má alls ekki kreista búkinn og best er að nota mjóa flísatöng til þess að ná honum.
Fara þarf varlega til þess að fjarlægja skógarmítil af húð. Það má alls ekki kreista búkinn og best er að nota mjóa flísatöng til þess að ná honum. Mynd/Erling Ólafsson
Líklegt er að skógarmítlar hafi tekið sér varanlega bólfestu hér á landi.

Skógarmítill er varasamt skordýr sem borar sig inn í hold spendýra og nærist á blóði þeirra. Þeir geta borið alvarlega sýkla í fórnarlömb sín, meðal annars Borrelia-bakteríuna, sem getur valdið Lyme-sjúkdómnum sem getur valdið alvarlegum skaða á taugakerfi.

Erling Ólafsson, skordýrafræðingur hjá Náttúrufræðistofnun Íslands, segir margt benda til þess að þeir hafi tekið sér bólfestu hér á landi.

„Þeim fór að fjölga um aldamótin og finnast nú í öllum landshlutum nema á hálendinu. Við höfum hins vegar ekki fundið yngsta þroskastigið. Það er mjög smátt og erfitt að finna það en ég hugsa að það sé kannski vænlegast að finna það með því að safna nokkur hundruð lifandi hagamúsum og kemba þær rækilega,“ segir Erling en finnist það þá gefur það til kynna að skógarmítillinn sé kominn til að vera hér en annars hefur hann borist til landsins með farfuglum.

Það er mikilvægt, sé fólk bitið af skógarmítli að fjarlægja skordýrið á réttan hátt, helst með sérstakri töng en einnig er hægt að leita læknisaðstoðar. Ekki hafa komið upp dæmi hérlendis þar sem fólk hefur smitast af Lyme-sjúkdómnum en Íslendingar hafa smitast erlendis.

Erlingur bendir fólki sem verður skógarmítils vart á að koma með dýrið á Náttúrufræðistofnun Íslands svo hægt sé að rannsaka tegundirnar betur. Einnig bendir hann fólki á að leita til læknis sé það bitið til þess að fá sýklalyf.




Fleiri fréttir

Sjá meira


×