Tíðahringurinn stýrir innkaupum kvenna

Tíðahringurinn stýrir innkaupum kvenna. Þegar þær eru með egglos, og þar með meira estrógen í blóðinu en á öðrum tímum, eru þær líklegri til að leita að fjölbreyttari vörum en annars. Þetta eru niðurstöður rannsóknar Kristinu Durante, sérfræðings í markaðsrannsóknum við UTSA-háskólann í Bandaríkjunum.

Nokkur hundruð konur á aldrinum 18 til 40 ára voru beðnar um að taka þátt í rannsókn Durante. Þær sem ekki greindu frá hvar þær voru í tíðahringnum og þær sem notuðu hormónagetnaðarvarnir eins og pilluna voru útilokaðar. Meðalaldur þátttakenda var 22 ár, að því er segir í frétt á vísindavefnum forskning.no.

Á hverjum degi í heilan mánuð voru konurnar látnar velja á milli varalita, naglalakks og skópara í 20 mismunandi litum. Þar að auki gátu þær valið á milli 20 mismunandi bragðtegunda af jógúrt og jafnmargra súkkulaðitegunda. Þær gátu valið sér eins margar tegundir og þær vildu.

Haft er eftir Durante að konur velji fleiri mismunandi tegundir þegar þær eru sem frjósamastar og sérstaklega þær sem eru í sambandi. Það hversu gott ástarsambandið er skiptir jafnframt máli. Því minna sem konur eru tengdar maka sínum, þeim mun fjölbreyttari vörutegundir velja þær. Vísindamennirnir ætla að reyna að finna skýringu á þessu. Durante segir að hægt sé að ímynda sér að þetta sé kannski eins og að fá aðgang að fleiri sviðum samfélagsins sem bjóði upp á betra aðgengi að nýjum maka með góð gen.

Bæði einhleypar konur og konur í sambandi velja fleiri tegundir af súkkulaði þegar þær eru sem frjósamastar. En konur sem eru ekki í mjög nánu sambandi við maka sinn velja miklu fleiri súkkulaðitegundir en þær sem eru í nánu sambandi. Í þessu samhengi er bent á að konur í góðu sambandi finni ekki fyrir þörf á fjölbreyttu vöruúrvali þar sem þær hafi fundið maka sem þær eru ánægðar með.

Það er mat vísindamannanna að rannsóknin gefi hugmyndir um hvað það er sem stýrir vali neytenda. Niðurstöðurnar hvetji til fleiri spennandi markaðsrannsókna.

Haft er eftir Durante að rannsóknin hafi einnig bent til að merkjatryggðin minnki í kringum egglos þar sem konur hafi þá meiri tilhneigingu til að skipta yfir í nýtt merki.

Greint er frá niðurstöðunum í Journal of Consumers Research.