Enginn sótti um 11 lausar stöður nyrðra

Enginn sérfræðilæknir sótti um starf hjá sjúkrahúsinu á Akureyri nú nýverið. Sjúkrahúsið auglýsti ellefu lausar stöður sérfræðilækna í vor. „Við höfum sent sams konar auglýsingar til Norðurlanda núna til að fylla í stöðurnar,“ segir Sigurður Einar Sigurðsson, framkvæmdastjóri lækninga við Sjúkrahúsið á Akureyri.

„Við auglýstum eftir töluvert mörgum stöðum en höfum ekki fengið umsókn frá íslenskum læknum. Nú eru komnar í birtingu sams konar auglýsingar á Norðurlöndunum og við finnum að sú auglýsing hefur vakið athygli einhverra því við erum farnir að fá einhverjar fyrirspurnir,“ segir Sigurður. „Það er auðvitað áhyggjuefni að íslenskir læknar sem eru úti hafi ekki sótt um en við vonum að þeir skili sér núna.“

Erfiðlega hefur gengið að manna þær stöður sem eru að losna og eru sérgreinalæknar á sjúkrahúsinu á Akureyri margir hverjir að komast á aldur og því þarf að ráða í margar stöður. Forsvarsmenn sjúkrahússins reyna því að fylla í margar stöður í þessari atrennu til að forðast að lenda í þeirri klemmu að vanta sérgreinalækna að nokkrum árum liðnum.

Sjúkrahúsið á Akureyri er stærsta sjúkrahúsið í landsbyggðunum og sinnir þjónustu við íbúa allt frá Húnaþingi vestra og langt austur á land. Sigurður segir ástæður þess að enginn hafi sótt um stöðurnar líklega margþættar.

„Það er skortur á sérgreinalæknum nú þegar á landinu og þeir íslensku læknar sem eru hér á landi eru nú þegar komnir í stöður. Einnig hefur efnahagshrunið 2008 líklega áhrif sem og að byggðasjónarmið geta einnig haft áhrif,“ segir Sigurður og segir erfiðara að fá lækna til starfa utan stórra þéttbýlisstaða. Það sé ekki séríslenskt fyrirbæri að erfiðara sé að manna stöður í dreifðum byggðum og það hafi sýnt sig í Evrópu að erfitt sé að manna stöður utan stórborga.

„Nú horfir kannski til betri tíma í efnahagslífinu og við erum að færa okkur upp úr öldudal hrunsins,“ segir Sigurður. „Við leggjum áherslu á að hér á Akureyri eru ýmis gæði sem við vinnum ekki á öðrum stöðum og við erum að benda á það fjölskylduvæna samfélag sem er hér til staðar á Akureyri. Vonandi náum við að fylla í stöðurnar á næstu vikum.“