Sundlaug og hoppdýna í Bláfjöllum í dag

„Það er ennþá nóg af snjó, svo mikill reyndar að það gæti komið mörgum á óvart,“ segir Davíð Arnar Oddgeirsson, upphafsmaður brettaveislunnar, aðspurður um stöðuna í Bláfjöllum í maí, en í dag verður Summerjam haldið þar í fjórða skiptið.

„Þetta verður geggjað, við erum búin að vera í þrjá daga að moka snjó og búa til palla fyrir skíðaparkið,“ segir Davíð.

Mun allri norðurleiðinni, öxlinni, breytt í almennilegt brettasvæði með tilheyrandi búnaði, ásamt því að plötusnúðnum DJ Lehoe verður komið fyrir í miðju fjallinu, þar sem hann spilar músík svo undir tekur í fjallgarðinum.

„Í fyrsta skipti á Íslandi verður boðið upp á að hoppa á stærðarinnar uppblásna dýnu af stökkpallinum, en hún er flutt til Reykjavíkur að norðan sérstaklega fyrir þetta tilefni,“ útskýrir Davíð.

Og áfram heldur hann: „Við höfum mokað eins og hálfs metra djúpa sundlaug sem verður fyllt af vatni og er til þess fallin að brettagarparnir komi á ferðinni og fleyti sér yfir hana,“ segir Davíð og bætir við að búið sé að koma upp sólbaðsbekkjum líkt og tíðkist við allar almennilegar sundlaugar enda veðurspáin eins og pöntuð fyrir viðburðinn. 

„Upphaflega ætluðum við að hafa þetta á laugardag, en breyttum því svo snarlega þegar veðurspáin var ljós, en spáð er logni, heiðskíru og sex gráðu hita. Það verður ekki betra.“

Flott veður, flottir pallar, flott stökk, flott lið á brettum. Byrjum á flottum tíma kl. 17-24. Búast má við flottri stemmingu. KOMA SVVVOOOO

Posted by Skíðasvæðin - Bláfjöll & Skálafell on Friday, May 22, 2015

Eins og áður segir er Summerjamið haldið í fjórða skipti í ár, og býst Davíð við að hópur fólks muni láta sjá sig líkt og árin á undan.

„Þetta byrjaði nú upphaflega þannig að búið var að loka skíðasvæðinu en feikinóg af snjó ennþá. Úr varð að ég fékk að henda í viðburð sem varð svona vinsæll að ekki er hægt að hætta.“

Hefjast herlegheitin klukkan fjögur í dag og standa fram eftir kvöldi, og kostar tvö þúsund krónur inn. Hægt er að kynna sér málið nánar á Facebook-síðu viðburðarins.