Hugmyndin sem tók óvænt á loft og allir eru að tala um

„Það er nokkuð ljóst að eftirspurnin er til staðar, við höfum ekki einu sinni skilað lokaskýrslunni en allir vita hvað þetta er,“ segir Heiður Rán, ein þeirra sem vinna að barnapössun.is sem fór á flug í byrjun vikunnar. „Þessi viðbrögð eru ekkert í líkingu við það sem við höfðum gert okkur í hugarlund, og koma okkur vissulega í opna skjöldu, en skerpa enn frekar á að þörfin er greinilega til staðar.“

Um ræðir verkefni hóps á þverfaglegu námskeiði á vegum Háskólans í Reykjavík og standa auk Heiðar þau Gyða Dröfn Sveinbjörnsdóttir, Halldóra Gunnarsdóttir, Hannes Þór Arnarsson, Helen Rut Ástþórsdóttir og Helga Guðmundsdóttir á bak við verkefnið. Heiður segist hafa fengið hugmyndina, en hún sé tveggja barna móðir sem finnur virkilega fyrir þörfinni á barnfóstrukerfi hér á land.

„Það er ekkert grín að vera útivinnandi með börn, þar sem foreldrar fá sjö daga á ári, óháð fjölda barna, í veikindadaga. Þá á eftir að gera ráð fyrir vetrarfríunum, starfsdögunum og öllu þessu sem bætist við,“ segir Heiður og bætir við að oftar en ekki fari frítími foreldra og barna forgörðum þar sem foreldrar neyðist oft til að nýta sumarfrísdaga til að vera heima með börnunum eftir að þessum sjö dögum er lokið.

„Þær lausnir sem í boði eru í dag eru aðallega barnapíur á bland.is og Fésbókarhópar. Það er ekki sérlega traustvekjandi, finnst okkur,“ segir Heiður og bendir á að hún hafi þó nokkuð oft rekið augun í auglýsingar í svona hópum þar sem myndir af börnum eru settar inn og óskað eftir pössun fyrir þau. Að auki sé ólöglegt fyrir einstaklinga undir 15 ára að auglýsa barnapössun á þessum miðlum, sem þó hefur tíðkast í mörg ár.

„Við viljum koma á fót kerfi sem byggir á öryggi og eftirliti, þar sem endurgjöf er mikilvægur partur. Þannig sé hægt að vera með aðhald og sigta úr rotin epli,“ segir hún. 

Greinilegt er að eftirspurnin er gríðarleg, en síminn hefur ekki stoppað síðan hópurinn stofnaði Fésbókarsíðuna „Þetta er svolítið skrítið, allt í einu eru allir að tala um þetta. Nú vonum við bara að þetta hafi í för með sér einhverja fjárfesta og svoleiðis svo við getum látið verða af þessu, því þörfin er greinilega til staðar,“ útskýrir Heiður.