Stebbi Hilmars boðinn upp

„Það sem er gaman við þetta er að listamennirnir sjálfir gefa verkin, þau koma ekki úr einkasafni heldur frá listamönnunum sjálfum,“ segir Íris Stefanía Skúladóttir, framkvæmdastýra hjá List án landamæra.

Í dag verður haldið uppboð til styrktar hátíðinni í Gamla bíói, en hátíðin í ár var sett þann 10. apríl í Ráðhúsi Reykjavíkur og stendur til 31. maí næstkomandi.

List án landamæra er árleg listahátíð sem leggur áherslu á fjölbreytileika mannlífsins. Markmið hátíðarinnar, sem haldin hefur verið frá árinu 2003, er að auka gæði, gleði, aðgengi, fjölbreytni og jafnrétti í menningarlífinu og koma list fólks með fötlun á framfæri og stuðla að samstarfi á milli fatlaðs og ófatlaðs listafólks.

Á uppboðinu verða 65 verk boðin upp eftir 57 listamenn sem koma úr ólíkum áttum, þjóðþekktir og minna þekktir.

„Við fengum óvænta glaðninga áðan. Steingrímur Eyfjörð og Hekla Dögg Jónsdóttir ákváðu að skella verkum í uppboðið, þau höfðu frétt af þessu og langaði til þess að gefa,“ segir Íris Stefanía glöð í bragði og bætir við að aðstandendur hátíðarinnar séu gífurlega þakklátir framlagi þeirra listamanna sem ákveðið hafi að gefa verk, og einnig gefi allt starfsfólk vinnu sína. 

Ágóði uppboðsins rennur allur óskiptur til hátíðarinnar sem mun halda áfram að vinna í þágu jafnréttis í menningarlífinu með því að styðja við listafólk með fötlun.

Fjölbreyttir listamenn taka þátt í uppboðinu og því ættu allir að finna eitthvað við sitt hæfi.

Um er að ræða þögult uppboð og hægt verður að bjóða í meiri hluta verkanna með því að skrá upphæðina á blað við hlið verka sem á uppboðinu verða en hægt er að skrá sig til þátttöku á vefsíðunni Midi.is eða með því að mæta á staðinn. 

„Það verða meðal annars margar af stjörnum hátíðarinnar. Til dæmis Karl Guðmundsson, Kalli, sem er listamaður Listar án landamæra 2015, Ísak Óli, sem sést á fleiri heimilum á landinu heldur en margir þjóðþekkir listmenn og Gígja Thoroddsen sem hefur verið í mörg ár á opnunum í Ráðhúsinu.“

Meðal verka sem boðin verða upp er forláta brúða af tónlistarmanninum Stefáni Hilmarssyni, sem listamaðurinn Kristján Ellert Arason saumaði með kambgarni í striga.

„Ef ég væri Stefán Hilmarsson myndi ég ekki hika við að næla mér í hana,“ segir Íris Stefanía glaðlega um brúðuna, sem er þannig frágengin að hægt er að hengja hana upp á vegg.

Uppboðið hefst klukkan 17.00 í Gamla bíói. Logi Bergmann verður kynnir og uppboðshaldari verður Viktor Smári hjá Stúdíó Stafn og Kenneth Máni sér um að skemmta gestum en einnig verður boðið upp á léttar veitingar. Nánari upplýsingar er hægt að nálgast á vefsíðunni Listin.is.