Áhugaverð viðfangsefni á Degi verkfræðinnar

Dagur verkfræðinnar er í fyrsta skipti haldinn í dag, föstudaginn 10. apríl, en Verkfræðingafélag Íslands hefur valið þennan dag til þess að vekja athygli á störfum verkfræðinga og viðfangsefnum þeirra í atvinnulífi, rannsóknum og nýsköpun.

Verkfræðin kemur víða við sögu í uppbyggingu atvinnulífs og bættra lífsskilyrða í harðbýlu landi og ennþá eru tækifærin næg, hvort sem er í hefðbundnum greinum verkfræðinnar eða þeim nýju sem komið hafa fram á undanförnum árum. Í hugbúnaðariðnaðinum, þróun innviða og hátækni fyrir heilbrigðisþjónustu, samgöngum, orkugreinum eða nýsköpun í atvinnulífinu – á öllum þessum sviðum koma verkfræðingar við sögu með þá þekkingu og færni sem byggir á krefjandi námi og reynslu við lausn margbreytilegra viðfangsefna.

Í tilefni dagsins gengst Verkfræðingafélag Íslands fyrir ráðstefnu sem hefst kl. 13 á Hótel Nordica, en hún er opin almenningi jafnt sem verkfræðingum og félagsmönnum VFÍ. Þar er annars vegar vakin athygli á verðmætasköpun verkfræðinnar og hins vegar þætti verkfræðinnar í uppbyggingu innviða heilbrigðisþjónustunnar. Verðmætasköpun tekur á sig ýmsar myndir, allt frá sölu verkfræðiþekkingar út í heim til stórstígra framfara í vinnslu sjávarafurða, öflun orku úr vindinum, verkfræðirannsókna og verkfræði með tilliti til sjálfbærni. Á sviði heilbrigðisþjónustu og innviða hennar koma verkfræðingar víða við sögu. Umræða um byggingu húsnæðis og aðstöðu hefur vart farið framhjá neinum, en verkfræðingar koma einnig að hönnun og þróun tæknibúnaðarins sem stendur undir nútíma heilbrigðisþjónustu – allt frá heilsugæslustöðvum til hátæknisjúkrahúsa.

Um þessi málefni og önnur áhugaverð viðfangsefni verkfræðinga verður fjallað á ráðstefnunni á Degi verkfræðinnar. Sérstaklega er ástæða til að hvetja ungt fólk til þess að kynna sér þessi viðfangsefni og sækja ráðstefnuna, en þar fara jafnframt fram kynningar á vegum háskólanna sem kenna verkfræðigreinar hérlendis og kynnt verða áhugaverð verkefni sprotafyrirtækja, alþjóðleg þróunarverkefni og viðfangsefni ungra frumkvöðla á sviði verkfræði.

Með Degi verkfræðinnar er ætlun okkar í Verkfræðingafélagi Íslands að hefja árvissan viðburð sem veki áhuga og skilning á þeim fjölbreytilegu og mikilvægu verkefnum sem verkfræðingar starfa við.

Hefurðu sögu að segja eða skoðun að deila? Ef svo er sendu okkur grein ásamt mynd á netfangið ritstjorn(hja)visir.is.