Ekki talið að Harper Lee hafi verið göbbuð til að gefa út nýja sögu

Í kjölfar þess að tilkynnt var um að rithöfundurinn Harper Lee myndi gefa út sína aðra skáldsögu hefur grunur leikið á að hún hafi verið göbbuð til að skrifa undir útgáfusamning. Í gær lauk rannsókn stofnunar sem kallast Alabama Securities Commission á málinu og er niðurstaðan sú að hin 88 ára gamla Lee sé sátt við ferlið og sé spennt fyrir útgáfu skáldsögunnar Go Set a Watchman, sjálfstæðu framhaldi af To Kill a Mockingbird, sem kom út 1960.

Hefur skoðanir

Joseph Borg, framkvæmdastjóri Alabama Securities Commission, stýrði rannsókn málsins. Hann segir, í samtali við New York Times, að hin aldraða Lee hafi getað svarað öllum þeim spurningum sem fyrir hana voru lagðar: „Hún hefur skoðanir á þessu öllu og virðist algjörlega vita hvað er í gangi með bókina og útgáfusamninginn.“ Í frétt New York Times kemur einnig fram að önnur rannsókn á málinu sé enn í fullum gangi, en hún er framkvæmd af stofnun sem kallast Mannauðsstofnun Alabama-fylkis.

Enn ekki öllu svarað

Í vefútgáfu tímaritsins The Atlantic, sem gefið hefur verið út frá árinu 1857, er ýmsum spurningum er varða málið velt upp. Þar kemur fram að Lee sé nánast algjörlega blind og heyrnarlaus. Í greininni kemur fram að vinir hennar séu ósammála um hversu meðvituð um útgáfuna Lee sé í raun og veru. Fjallað er um Alice, systur Harper Lee, sem var eins konar verndari hennar. Hún lést í nóvember og telja einhverjir það undarlegt að Harper Lee vilji gefa út sína aðra skáldsögu á ferlinum svo skömmu eftir dauða Alice, sem varði systur sína fyrir ágangi fjölmiðla alla þeirra ævi.

Áætluð útgáfa í júlí

Í síðasta mánuði tjáði Harper Lee sig við fjölmiðla með skriflegri yfirlýsingu. Hún hefur í gegnum tíðina verið lítið fyrir að tjá sig við fjölmiðla. Á vef BBC var haft eftir henni að hún hlakkað til útgáfu bókarinnar: „Ég er spræk og hamingjusöm með viðtökurnar sem bókin hefur fengið.“ 

Bókin á að koma út í Bandaríkjunum þann 14. júlí. Fylgst er með helstu söguhetju To Kill a Mockingbird, Jean Louise „Scout“ Finch, á fullorðinsárum hennar. Hún heimsækir föður sinn tuttugu árum eftir atburðina í To Kill a Mockingbird.

 

Lögfræðingurinn fann söguna

Harper Lee skrifaði Go Set a Watchman áður en hún skrifaði hina margverðlaunuðu To Kill a Mockingbird. Lögfræðingur rithöfundarins, Tonja Carter, er sögð hafa fundið söguna ásamt öðrum hlutum í eigu Harper Lee. Sagan mun hafa verið skrifuð á sjötta áratug síðustu aldar, en útgefandi Harper Lee hvatti hana til þess að skrifa sögu frá sjónarhorni „Scout“ þegar hún var yngri. Handritið af Go Set a Watchman hafi svo týnst og svo fundist tæpum sex áratugum síðar, síðastliðið haust.