Notar gong í heilun, hugleiðslu og slökun

„Fyrir mörgum árum sagði góð vinkona mín við mig að ég þyrfti að læra að spila á gong. Ég fjárfesti í gongi og hef spilað á það síðan,“ segir Siri Gopal Singh kundalini-jógakennari og gong-heilari. Hann er frá Los Angeles og er staddur hér á landi og mun kenna námskeið í gong-heilun um helgina.

„Gong er notað á margskonar máta, í sinfóníum, rokkhljómsveitum og á allskyns tónlistarvettvangi. Ég spila á það og eins og ég var þjálfaður til,“ segir Siri Gopal, sem notar hljóðfærið í heilun, hugleiðslu og slökun.

Hann hefur spilað á gong í sjö ár og ferðast víða. „Nú ferðast ég um heiminn og kenni. Um helgina er ég á Íslandi og í desember var ég í Kína að kenna allt frá viðskiptafólki til heimavinnandi húsmæðra.“

Hann segir hægt að nota gong til þess að vinna á ýmiss konar kvillum og létta lund.

„Ég var með viðskiptavin sem var á leið í aðgerð. Ég gerði læknandi gong-hugleiðslu fyrir hana sem róar hugann svo hún gæti verið afslöppuð og tilbúin fyrir aðgerðina.“

Siri Gopal hefur einnig haft nemendur og viðskiptavini sem glíma við þunglyndi eða eru að komast yfir sambandsslit.

Hann hefur mikla ánægju af starfi sínu. „Hvenær sem ég er að vinna með nema eða er með hóptíma er ég líka að njóta góðs af því,“ segir hann og bætir við að hann spili einnig á gong í einrúmi fyrir sjálfan sig.

„Ég var með kennara sem lærði að spila á gong af Yogi Bahajan í mörg ár. Ég tók marga tíma og svo skiptir máli að halda áfram og æfa sig stöðugt, eins og með allt.“

Sjálfur á Siri Gopal tvö gong. „Það eru sumir sem verða yfir sig hrifnir af gongum, eiga kannski ellefu stykki og eru með þau um allt hús,“ segir hann og hlær.

„Ég kýs fremur að einbeita mér að því að nota eitt gong og skapa samband við það,“ segir hann og bætir við að hljóðið í gonginu breytist með árunum.

Siri Gopal ferðaðist með gong til landsins sem mun vera í jógastöðinni Andartak þar sem það verður notað í heilun og gong-slökun.

„Það er um áttatíu sentimetrar að stærð og mjög fallegt. Það mun hljóma dásamlega um helgina en eftir nokkur ár mun það búa yfir enn ríkari hljómi vegna þess að það mun drekka í sig allt íslenska loftið,“ segir hann og hlær.

Siri Gopal verður með opið námskeið í Andartak Kundalini-jógastöð um helgina, nánari upplýsingar má nálgast á Andartak.is.