Nýsköpunarmiðstöð Íslands átta ára

Fyrir átta árum hófst starfsemi nýrrar stofnunar hér á landi þar sem steypt var saman Iðntæknistofnun og Rannsóknastofnun byggingariðnaðarins með nýjum lögum. Nýsköpun er ein undirstaða hagvaxtarins sem þjóðarbúið þarf til að halda samkeppnisstöðu sinni á alþjóðlegum markaði. Það er ljóst að hér á okkar litla landi erum við ekki að keppa innbyrðis um fyrirtækin og frumkvöðlana, heldur erum við í samkeppni við það sem best gerist í hinum stóra heimi. Það er allra hagur að byggja upp fjölbreytt atvinnulíf og nýta vel þær auðlindir sem fyrir hendi eru, en ekki síður að hlúa að hugvitinu og skapa ný atvinnutækifæri á grundvelli þess. Hafa ber í huga að það er mjög auðvelt að flytja á milli landa fyrirtæki og störf, sem byggja á hugviti og að sjálfsögðu leita forsvarsmenn fyrirtækja í ákjósanlegustu aðstæður sem völ er á. Það eru fyrirtækin sem skapa arð og aukin framleiðni þeirra skapar hagvöxt. Til að skapa fyrirtækjunum ákjósanlegt starfsumhverfi þurfa aðstæður hér heima fyrir að vera á meðal þess sem best gerist á samkeppnissvæðum okkar.

Nýsköpunarmiðstöð Íslands hefur þá sérstöku og eftirsóknarverðu stöðu að einbeita sér að verkefnum sem að jafnaði eru komin frá stigi grunnrannsókna og nálgast framleiðslu eða markaðssetningu vöru og þjónustu. Um leið forðast stofnunin að vera í samkeppni þar sem markaðurinn er að sinna hlutverki sínu með ákjósanlegum hætti. Starfsfólk miðstöðvarinnar á samtöl við þúsundir frumkvöðla og fyrirtækja á ári hverju og hefur náin tengsl við fjöldann allan af sprotafyrirtækjum bæði á frumkvöðlasetrum og víðsvegar um landið.

Í samvinnu við Reykjavíkurborg var setur skapandi greina opnað við Hlemm, en það samanstendur af þremur setrum, sem eru Tónlistarklasinn, Gasstöðin og Hellirinn. Með opnun þessa seturs skapast sérlega góð aðstaða fyrir frumkvöðla og fyrirtæki á breiðu sviði skapandi greina til að vinna að viðskiptahugmyndum sínum auk þess sem þetta framtak hefur sett nýjan og jákvæðan svip á svæðið í kringum Hlemm. Rannsókn sem gerð var við Uppsalaháskóla á árinu og bar saman frumkvöðlasetur okkar við sambærileg setur í Evrópu leiddi til afar góðra niðurstaðna okkur í hag.

Ál- og kísilframleiðsla eykst mjög hér á landi. Nýsköpunarmiðstöð svaraði kalli nýsköpunarráðherra á árinu og setti á stofn ál- og kísilþróunarsetur þar sem löng reynsla okkar og þekking er beisluð til þess að þjóna þörfum hins vaxandi iðnaðar.

Í samvinnu við Fjölbrautaskólann í Breiðholti, Reykjavíkurborg og menntamálaráðuneytið setti stofnunin á fót nýja FabLab-smiðju í Eddufelli í Breiðholti á árinu. Verkefnið hefur tekist með ágætum. Eins var opnuð ný FabLab-smiðja á Norðfirði og bætast þessar smiðjur við starfsemi miðstöðvarinnar á þessu sviði í Vestmannaeyjum, á Ísafirði og Sauðárkróki.

Loks ber að geta að þátttaka okkar í starfi íslenska jarðvarmaklasans hefur verið farsæl. Energy Start-up ræsingarverkefni þar hafa tekist með ágætum. Ræsingarverkefni Nýsköpunarmiðstöðvar víða um land munu fylgja í kjölfarið en þessi verkefni eru til að draga fram nýjar viðskiptahugmyndir á viðkomandi svæðum, meta þær faglega og styðja þær sem skara fram úr til frekari ávinnings. Fyrsta ræsingarverkefnið var gangsett í Skagafirði sl. haust með afar góðum árangri. Fram undan eru ræsingarverkefni í Fjallabyggð, á Austfjörðum og víðar.

Verið velkomin á ársfund Nýsköpunarmiðstöðvar Íslands á Hilton Nordica í fyrramálið.