Björk Eiðsdóttir fékk heilablæðingu: "Karl í minni stöðu hefði ekki upplifað sömu viðbrögð“

Björk Eiðsdóttir, ritstjóri MAN og þáttastjórnandi á Hringbraut, varð fyrir heilablæðingu og var flutt á sjúkrahús fyrir tveimur vikum síðan. Björk greinir frá þessu í nýjum pistli á hringbraut.is.

Björk segir frá því að hún hafi fundið fyrir svima, höfuðverk og skekkju á vinstri hluta andlitsins. Vinkonur hennar og dóttir hafi að lokum sanfært hana um að fara á Læknavaktina sem endaði svo með ferð í sjúkrabörum á sjúkrahús.

Heilablæðingu við mænukylfuna

Í pistlinum segir að hún hafi orðið fyrir heilablæðingu við mænukylfuna, eða svokallað Wallenberg-heilkenni. „Hún er óútskýrð og ekkert sem ég gerði eða ekki gerði olli henni eða hefði komið í veg fyrir hana. Það var ekki streita, háþrýstingur eða neitt slíkt sem varð til þess að æðin rofnaði og hefði hún gert það þó ég væri barnlaus jógakennari í hamingjusömu hjónabandi sem drekkur grænt te og borðar hráfæði í hörfötum við lágstemmda slökunartónlist alla daga.“

Björk segir að þar sem hún sé „aftur á móti þriggja barna einstæð móðir sem rekur fyrirtæki, ritstýrir tímariti, stjórnar vikulegum sjónvarpsþætti og tekur virkan þátt í lífinu, virtist enginn (nema heilbrigðisstarfsfólk) efast um að ég hefði hreinlega keyrt mig út, unnið yfir mig... loks bugast af álaginu. Ekki síst vegna þess að sá grunur læðist sterklega að mér að karl í minni stöðu hefði ekki upplifað sömu viðbrögð.“

Kalt vatn rennur niður bakið 

Hún spyr hvort það verið það fyrsta sem fólki dytti í hug ef karlkyns yfirmaður á besta aldri og í fínu formi hefði lagst inn á spítala. „Ég leyfi mér að segja nei. Sjálfri leið mér svolítið eins og fólk vildi bara að ég legði mig, slakaði aðeins á og breytti forgangsröðuninni.“

Þetta segir hún að fái kalt vatn til að renna niður bak hennar. Lesa má pistil Bjarkar á hringbraut.is.