Sólskinsdagur í Sólheimum

Það verður líf og fjör á Sólheimum í dag þar sem haldið verður upp á Lífræna daginn í Menningarveislu Sólheima. Þessi hátíð er nú haldin í tíunda sinn en fleiri stórafmælum verður fagnað þennan dag á Sólheimum.

„Það hittir svo á að í ár eru einnig þrjátíu ár frá Íslandsgöngu Reynis Péturs og Skátafélag Sólheima á einnig þrjátíu ára afmæli. Það er því nóg af tilefnum til að fagna,“ segir Valgeir F. Bachman, skipuleggjandi Menningarveislunnar, en þegar blaðamaður heyrir í honum hljóðið er undirbúningur á fullu. Verið er að reisa markaðstjaldið þar sem framleiðslan sem fer fram á Sólheimum verður til sölu með góðum afslætti.

Að auki verða tvennir tónleikar í Sólheimakirkju, útileikir og spil fyrir alla fjölskylduna, Háskólalestin mætir með fræðandi skemmtun og sýningin um gönguferð Reynis Péturs verður opin. Skátafélagið vígir nýtt skátaheimili á afmælinu og fagnar með varðeldi þar sem hægt verður að baka brauð á priki og skátasöngvar sungnir.

„Það myndast alltaf gífurlega góð stemning á þessum degi og hefur í raun verið góð stemning hjá okkur í allt sumar. Það hefur aldrei verið jafn mikið að gera hjá okkur. Enda er alltaf sól í Sólheimum þótt það rigni aðeins,“ segir Valgeir.



Lífræni dagurinn á Menningarveislu Sólheima 

12:00-18:00         Kaffihúsið Græna kannan, verslunin Vala og markaðstjald

13:00-17:00         Leikir fyrir börn á öllum aldri á túninu

14:00-17:00         Háskólalestinn í Íþróttaleikhúsinu/ túni.

14:00-15:00         Magnea Tómasdóttir og Inga Björk Ingadóttir  með tónleika í Sólheimakirkju

15:00-17:00         Vorsabær II kemur með hesta, teymt undir.

15:30-17:00         Söngur, gleði og varðeldur í Tröllagarði

                            Skátadagurinn, stofnendur segja sögu og vígja Skátaheimili Sólheima

16:00-17:30         Lífrænt grænmetiströllaseyði af hlóðum Tröllagarðs

16:00-17:00         Nikolaus Kattner trúbador treður upp við Grænu könnunna