Sverrir Guðnason valinn besti leikari í aðalhlutverki

Sverrir Guðnason hlaut í kvöld sænsku kvikmyndaverðlaunin Guldbaggen fyrir besta leik í aðalhlutverki. Verðlaunin hlaut Sverrir fyrir leik sinn í kvikmyndinni Flugparken, sem fjallar um fyrrverandi hokkíleikara sem þarf að takast á við dauða besta vinar síns.

Sverrir var einnig tilnefndur á hátíðinni í flokki aukaleikara fyrir hlutverk sitt í kvikmyndinni Gentlemen.

Þetta er í annað sinn sem Sverrir er verðlaunaður á Guldbaggen-hátíðinni en í fyrra var hann valinn besti leikari í aukahlutverki fyrir leik sinn í stórmyndinni Monica Z. 

Í þakkarræðunni sendi Sverrir kveðju til föður síns og fjölskyldu á Íslandi. Sverrir ólst upp í Reykjavík en fluttist til Svíþjóðar fyrir 25 árum. Íslenskir áhorfendur þekkja hann ef til vill fyrst og fremst fyrir að leika Pontus í sjónvarpsþáttunum um Wallander.

Kvikmyndin Turist, eða Force Majeure, var sigursælasta mynd kvöldsins með sex verðlaun. Var meðal annars heiðruð sem besta myndin og fyrir bestu leikstjórn. Hún var framlag Svía til Óskarsverðlaunanna í ár en hlaut ekki náð fyrir augum valnefndarinnar.

Bäst manliga huvudroll går till: Sverrir Gudnason för rollen som Kristian i Flugparken #Guldbaggen

— Guldbaggen (@Guldbaggen) January 26, 2015

Hér fyrir neðan má sjá sýnishorn úr Flugparken. Myndin var frumsýnd í lok nóvember.