Skelfilegt ástand við landamæri Slóveníu og Króatíu

Algjört hörmungarástand er við landamæri Króatíu og Slóveníu en króatísk yfirvöld flytja flóttamenn í stórum stíl og skilja þá eftir við landamærin.

Tvö þúsund nýir flóttamenn komu til Slóveníu í dag en í gær voru þeir um fjögur þúsund. Flóttamennirnir streyma yfir landamærin við Króatíu nálægt Rigonce. Þessar myndir (sjá myndskeið) voru teknar af sjálfboðaliðum í Rigonce við landamærin aðfaranótt sunnudags.

Á fésbókarsíðu Are You Syrious má sjá myndir sem sjálfboðaliðar hafa tekið í Rigonce en þær nýjustu birtust fyrir 3 klst.

Sjálfboðaliðar á landamærunum lýsa hörmungarástandi sem þetta fólk býr við. Það er án vetrarfatnaðar og matar en hitastig fer nú hratt lækkandi á þessum slóðum. Króatísk stjórnvöld hafa flutt flóttamenn í stórum stíl að landamærunum við Slóveníu og á fréttavef BBC var talað um að króatísk stjórnvöld væru að „dömpa“ þeim eða losa sig við þá við landamærin, eins ómannúðlega og það hljómar. 

Sjálfboðaliði sem er staddur við Rigonce á landamærunum segir að staðurinn sé „helvíti á jörðu.“ Maturinn sé ekki upp á marga fiska, einn læknir sé á svæðinu til að sinna mörg þúsund manns og engin lyf séu til staðar. Þá vantar rennandi vatn og hreinlætisvörur.

Þetta fólk sem er við landamæri Króatíu og Slóveníu kemur inn í Króatíu gegnum Serbíu. Mikill fjöldi þeirra er frá Sýrlandi en einnig Írak, Íran og Norðaustur-Afríku.

Eftir að Ungverjar lokuðu sunnanverðum landamærum sínum með vírgirðingu færðist leið flóttamanna inn í álfuna gegnum Króatíu og þaðan til Slóveníu en sextíu þúsund flóttamenn hafa komið til Slóveníu á síðustu tíu dögum.

Flóttamannastraumurinn inn í álfuna eru stærstu búferlaflutningar í Evrópu frá síðari heimsstyrjöld.