Heimspekin án efa drottning vísindanna

„Það má segja að heimspekin sé drottning vísindanna en þar sem fræðin enda tekur heimspekin við,“ segir Magnús Árni Magnússon, prófessor við HHS-námið á Bifröst.

Magnús er einn þeirra sem komu að því að setja saman HHS-námið árið 2005. HHS stendur fyrir hagfræði, heimspeki og stjórnmálafræði. Námið er BA-nám sem fléttar saman efnistök og aðferðir þriggja grunngreina hug- og félagsvísinda til að auka víðsýni einstaklinga og skilning þeirra á álitaefnum sem koma upp í samfélaginu hverju sinni.

Háskólinn á Bifröst fagnar um þessar mundir að tíu ár eru frá því að skólinn setti námsbrautina á laggirnar. Í tilefni af tímamótunum var blásið til fagnaðar í Iðnó á þriðjudagskvöld.

Margir fyrrverandi nemendur voru komnir saman til að halda upp á námið. Meðal gesta sem tóku til máls voru þrír fyrrverandi nemendur; þær Sigrún Ósk Kristjánsdóttir sjónvarpskona, Hlédís Sveinsdóttir frumkvöðull og Brynhildur Björnsdóttir varaþingmaður.

Jón Sigurðsson, fyrrverandi rektor Bifrastar, var sérstakur heiðursgestur en hann flutti erindi í tilefni af afmælinu.

„Þetta er frábært nám fyrir fólk sem ætlar að skilja heiminn. Þetta er mjög góð innsýn inn í fögin þrjú sem saman mynda góða innsýn inn í samfélagið, landsins gagn og nauðsynjar,“ segir Magnús.

Eins og áður hefur komið fram er Magnús einn þeirra sem komu að því að setja námið á laggirnar fyrir tíu árum.

„Það er alltaf gaman að koma að því að búa til nýtt nám. Þetta á sér í raun hundrað ára breska fyrirmynd frá Oxford. Fjölmargir leiðtogar hafa farið í gegnum þetta nám og til dæmis voru öll forsætisráðherraefni í bresku þingkosningunum um daginn með þetta nám á ferilskránni.“

Magnús segir að námið hafi farið vel af stað árið 2005 og vaxið ört síðan þá.

„Við höfum verið með glæsilegan hóp og þarna hafa útskrifast stjórnmálamenn og fjölmiðlamenn og margt fólk sem fór áfram í nám erlendis í mjög flottum skólum.“