Alexander Birgir Grindvíkingur ársins

Alexander Birgir Björnsson og fjölskylda hafa verið valin Grindvíkingar ársins 2014 en þetta kemur fram í frétt á síðu Grindavíkurbæjar.

Hinn 13 ára gamli Alexander Birgir var hugmyndasmiðurinn á bakvið tónleika sem haldnir voru í Grindavíkurkirkju í nóvember.

Alexander Birgir skipulagði tónleikana sem voru til styrktar Einhverfusamtökunum og Birtu - landssamtökum foreldra barna/ungmenna sem látist hafa fyrirvaralaust.

Boðið var uppá þriggja tíma dagskrá þar sem landsþekktir tónlistarmenn léku fyrir troðfullu húsi.

Fjöldi tilnefninga bárust um Grindvíking ársins og voru þær nánast allar á einn veg.

Sérstök valnefnd fer yfir tilnefningarnar og var hún á einu máli að Alexander Birgir og fjölskylda hans ættu það fyllilega skilið að vera valinn Grindvíkingar ársins 2014.