Greiningar- og ráðgjafarstöð ríkisins – þjónusta byggð á þekkingu

Fagmennska, virðing, velferð og framsækni eru einkunnarorðin í starfsemi Greiningar- og ráðgjafarstöðvar ríkisins sem var stofnuð 1986. Hún þjónar börnum með alvarlegar þroskaraskanir og ýmsar fatlanir og fjölskyldum þeirra af öllu landinu. Greiningarstöð heyrir undir velferðarráðuneytið og starfar samkvæmt lögum nr. 38 frá 2003. Markmið starfseminnar er að tryggja að fötluðum börnum og unglingum bjóðist greining, ráðgjöf og önnur úrræði sem efla færni og sjálfstæði þeirra til framtíðar. Skjólstæðingum með flóknar eða sjaldgæfar fatlanir er veitt sérstök eftirfylgd og ráðgjöf til lengri tíma. Leiðarljós í starfsemi Greiningarstöðvar er fræðasýnin um taugaþroska, auk þess sem byggt er á hugmyndafræði fjölskyldumiðaðrar þjónustu. Foreldrar eru hvattir til að taka virkan þátt í íhlutun og að eiga hlutdeild í ákvörðunum er varða þjónustu við barn og fjölskyldu. Fræðsla um fatlanir og kennsla í sérhæfðum vinnubrögðum eru mikilvægir þættir í starfi stofnunarinnar. Rannsóknir og þátttaka í fræðastarfi innan lands sem og utan er einnig meðal lögbundinna verkefna.

Til að Greiningarstöð geti sinnt hlutverki sínu þarf hún á ríkulegum mannauði að halda. Sá mannauður byggir á háskólamenntuðu starfsfólki sem býr yfir sérþekkingu og reynslu. Í röðum starfsmanna er fólk úr ólíkum heilbrigðisgreinum og má þar nefna félagsráðgjafa, iðjuþjálfa, sjúkraþjálfara, talmeinafræðinga, þroskaþjálfa, sálfræðinga, sérkennara og atferlisfræðinga. Á Greiningarstöð leggur háskólamenntað starfsfólk sig fram um að veita bestu mögulegu þjónustu og fræðslu sem byggir á gagnreyndum leiðum. Ólík þekking og reynsla er sameinuð í þverfaglegri teymisvinnu sem hefur það markmið að skapa lausnir sem mæta fjölþættum þörfum fatlaðra barna og fjölskyldna þeirra. Slíkt er ekki einungis til hagsbóta fyrir viðkomandi skjólstæðinga heldur einnig fyrir samfélagið allt.

Á tyllidögum halda ráðamenn því gjarnan á lofti að íslenskt samfélag sé á pari við önnur norræn ríki hvað varðar velferðarþjónustu. Munurinn er þó sá að hjá frændþjóðum okkar er menntun metin að verðleikum og skilar sér í launaumslag fólks. Því er ekki að heilsa hér á landi. Það er kominn tími til að stjórnvöld átti sig á því að framlag háskólamanna til félags- og heilbrigðisþjónustu er ómissandi þekking og framtíðaruppbygging þjónustunnar veltur á henni, svo einfalt er það. Kæru Íslendingar – leiðréttum laun háskólafólks og missum ekki þekkinguna úr landi. Hvetjum stjórnvöld til að verða við þeim sanngjörnu kröfum sem Bandalag háskólamanna setur fram. Fjárfestum í mannauði og menntun – á því byggist velferð komandi kynslóða!

Höfundar eru í Bandalagi háskólamanna og starfa á Greiningar- og ráðgjafarstöð ríkisins.

Hefurðu sögu að segja eða skoðun að deila? Ef svo er sendu okkur grein ásamt mynd á netfangið ritstjorn(hja)visir.is.