Forritar á meðan bekkjarsysturnar dansa

„Mér finnst vanta fyrirmyndir fyrir stelpur í forritun, svo þær hafi sterkari sjálfsmynd og haldi þannig áfram í faginu,“ útskýrir Ólína Helga Sverrisdóttir, fimmtán ára forritari, fyrirlesari og kennari í forritun, sem hefur verið að gera það ansi gott þrátt fyrir ungan aldur.

„Ég byrjaði þegar ég var níu ára, þá til að hjálpa mömmu með verkefni sem sneri að því að athuga hvort krakkar á þessum aldri hefðu áhuga á forritun. Mér fannst þetta fyrst mjög nördalegt og vildi ekki vera að auglýsa þetta neitt,“ segir Ólína aðspurð um upphafið að þessum brennandi áhuga á forritun.

Feimin við nördastimpilinn

„Ég sagði krökkunum í bekknum frá þessu svolítið seinna, og þá fannst strákunum þetta töff, en stelpurnar höfðu engan áhuga. Þær vildu frekar tala um dans. En það er bara vegna þess að stelpur vantar fyrirmyndirnar,“ útskýrir Ólína, og með þá staðreynd fyrir augum tók hún málin í sínar hendur og stofnaði bloggsíðuna techolina.com þar sem hún færir áhugasömum stelpum fyrirmyndirnar á silfurfati.

„Ég tók til að mynda viðtal við Megan Smith, yfirmann tæknimála hjá Google, og hún fór með mig í persónulega sýnisferð um höfuðstöðvarnar,“ segir hún, en umrædd Megan er nú yfir tæknimálum Hvíta hússins í Bandaríkjunum svo Ólína gæti sennilega ekki hafa verið í betri höndum. „Ég verð samt alltaf stressuðust um að þær snúi spurningunum á mig, sem ég veit alveg að þær munu gera,“ skýtur Ólína að og skellir upp úr.

Út fyrir þægindarammann

Ólína segist eiga erfitt með að tala fyrir framan hóp af fólki og ekki laust við að sú yfirlýsing komi blaðamanni töluvert á óvart, í ljósi þess að Ólína hefur verið iðin við að stíga á svið og ræða forritun undanfarin ár, og var til að mynda aðalfyrirlesari á Geekiwood-ráðstefnunni í Flórída í fyrra. „Það var til dæmis mjög stressandi, og ég kom beint á eftir fyrirlesara frá NASA,“ bendir hún lauflétt á.

Ólína hefur einnig komið fram á evrópskri kvennaráðstefnu á vegum NMI árið 2012, þá tólf ára, og hélt svo erindi fyrir hönd Jafnréttisstofu á alþjóðlegri jafnréttisráðstefnu í júlí á þessu ári. Hún mun svo messa yfir íslenskum tæknitröllum á Haustráðstefnu Advania í byrjun september. „Ég er bara að ýta mér út fyrir þægindarammann minn, það er gott.“

Spurð um hvað framtíðin beri í skauti sér fyrir unga konu sem gerir nákvæmlega það sem henni sýnist, segist Ólína ekki hafa gert það upp við sig að fullu, en hún hefur hug á að sækja sér menntun í Menntaskólann við Hamrahlíð. „Þá get ég tekið stúdentsprófið á tveimur árum og farið út í skóla, og verið jafngömul hinum nemendunum. Annars ætla ég bara að koma meira fram og taka fleiri viðtöl,“ segir þessi harðduglega hugsjónakona að lokum.