Ríkið vinnur að útspili í kjaradeilunum

Ríkisstjórnin fundar með aðilum vinnumarkaðarins í vikunni til að finna möguleg útspil ríkisstjórnarinnar í kjaradeilum. Samtöl eru þó skammt á veg komin. Samkvæmt heimildum Fréttablaðsins leggur ríkisstjórnin áherslu á að útspilin komi fram fljótlega eftir páska, áður en verkföll hefjast.

Meðal þess sem komið hefur til tals sem útspil ríkisstjórnarinnar er hækkun og samræming á húsaleigu- og vaxtabótum, lækkun skatta á leiguhúsnæði og lækkun tryggingagjalds, breytingar á Íbúðalánasjóði og aðrar breytingar á húsnæðis- markaðnum til að mæta aukinni eftirspurn eftir húsnæði, sérstaklega litlum og millistórum íbúðum.

Atvinnurekendur telja viðleitni ríkisstjórnarinnar til að halda sér til hlés í þessum viðræðum að undanförnu hluta vandans. Ríkisstjórnin geti ekki verið stikkfrí og taki hún ekki þátt í því að smíða skynsamlegar lausnir muni það koma niður á kjaraviðræðum ríkisins við sína hópa.

Samtök atvinnulífsins (SA) segjast aldrei hafa staðið frammi fyrir jafn háum kröfum. Starfsgreinasambandið (SGS) krefst 50 til 70 prósenta hækkunar fyrir alla félagsmenn í þriggja ára samningi og að lægstu laun hækki hlutfallslega mest. Önnur verkalýðsfélög krefjast 20 til 45 prósenta launahækkana fyrir samning til eins árs. Búist er við að aðildarfélög SGS grípi til verkfallsaðgerða í kringum 10. apríl.

SA segja tuga prósenta launahækkanir óraunhæfar og þær muni leiða af sér mikla verðbólgu og verri lífskjör.