Segir vanda Samfylkingar „djúpstæðari“ en Árna Pál

Það er mikil einföldun að halda að vandi Samfylkingarinnar liggi í núverandi formanni flokksins, hann er miklu djúpstæðari en svo, segir Ingibjörg Sólrún Gísladóttir fyrrverandi formaður Samfylkingarinnar. Fyrrverandi formaður Alþýðuflokksins biður Ingibjörgu Sólrúnu að líta í eigin barm. 

Ingibjörg, sem er fyrrverandi utanríkisráðherra og formaður Samfylkingarinnar, tjáir hún sig um nýafstaðið formannskjör í Samfylkingunni í viðtali í Sunnudagsmogganum. 

Sem kunnugt er sigraði Árni Páll Árnason Sigríði Ingibjörgu Ingadóttur með aðeins eins atkvæðis mun en Sigríður tilkynnti um framboð sitt sólarhring fyrir landsfund flokksins. Niðurstaðan þótti mikið áfall fyrir formanninn.

Í viðtalinu segir Ingibjörg Sólrún: „Þetta var eiginlega að stytta sér leið að formannsframboði, sem mér finnst ekki til fyrirmyndar. Ef Sigríður hefði unnið formannskjörið með einu atkvæði, en ekki Árni, hefðu bæði hún sjálf og flokkurinn verið í miklum vanda. Það er líka mikil einföldun að halda að vandi Samfylkingarinnar liggi í formanninum. Vandinn er talsvert dýpri og útheimtir heiðarlega greiningu en ekki upphrópanir og aftökur.“

Samfylkingin fékk aðeins 12,9 prósent í síðustu þingkosningum og fór úr 20 kjörnum þingmönnum í 9. Þá hefur fylgi Samfylkingarinnar á kjörtímabilinu verið langt undir því fylgi sem flokkurinn hafði undir forystu Ingibjargar Sólrúnar en hægt er að skoða fylgisþróunina hér. 

Ingibjörg Sólrún á að líta í eigin barm

Fréttastofan hafði samband við Sighvat Björgvinsson fyrrverandi formann Alþýðuflokksins til að fá viðbrögð hans við orðum Ingibjargar Sólrúnar en Ingibjörg gerir ekki tilraun til að útskýra það í viðtalinu í hverju hinn djúpi vandi felst.  

Samfylkingin hefur ekki náð vopnum sínum. Sumir segja að Samfylkingin hafi veikt tengsl sín við verkalýðshreyfinguna. Ertu sammála því? Núna hefur formaður Samfylkingarinnar ekki tekið með skýrum hætti undir kröfur Starfsgreinasambandsins um nafnlaunahækkanir lágmarkslauna en það hefur Katrín Jakobsdóttir formaður VG gert. Er Samfylkingin að missa tengsl við kjarna kjósenda sinna?

„Hún hefur ekki ræktað þau tengsl nægilega vel að mínu mati. Það er ekki nóg að hafa samband við forystumennina í félögunum heldur hafa samband við fólkið sjálft. Það er það sem á í vanda. Það er ekki Samfylkingin sem á í vanda heldur fólkið sem Samfylkingin á að berjast fyrir. Það er vandi Samfylkingarinnar að gera sér grein fyrir því,“ segir Sighvatur Björgvinsson fyrrverandi formaður Alþýðuflokksins.

Sighvatur rifjar upp að Samfylkingin hafi verið stofnuð sem breiðfylking jafnaðarmanna en líka til að vera valkostur við stjórnarfar á móti Sjálfstæðisflokknum. 

„Fyrrverandi formaður (Ingibjörg Sólrún) steig hins vegar það skref að ganga til liðs við þann flokk sem Samfylkingin átti að bjóða sig fram gegn. Án þess að ná nokkru fram af þeim megin stefnumálum sem Samfylkingin barðist fyrir. Þannig að hún verður nú líka að líta svolítið í eigin barm,“ segir Sighvatur og er þar að vísa til þess að Ingibjörg Sólrún myndaði ríkisstjórn með Geir H. Haarde og Sjálfstæðisflokknum eftir þingkosningar árið 2007.