Berar að ofan í bol í annarri lotu brjóstabyltingar

„Bolirnir eru hannaðir með þá í huga sem vilja sýna stuðning í verki en vilja ekki endilega vera berir að ofan,“ segir Sunna Ben, myndlistarkona og aktívisti, sem hannaði bolina í tilefni samkomu berbrystinga í frelsun geirvartanna á Austurvelli á laugardaginn kemur. 

„Ég valdi að hafa lokk í geirvörtunni þar sem það sýndi sig á samfélagsmiðlunum hve gríðarlega margar stelpur voru með svoleiðis. Það er dálítið töff og passar vel við tilefnið,“ útskýrir Sunna.

Hafa nú yfir tólf hundruð manns boðað komu sína á Austurvöll. „Okkur langar að búa til umhverfi þar sem konum finnst þær mega vera berar að ofan ef þær vilja. Við viljum að það myndist þægileg stemning fyrir fólk til að koma saman og sýna stuðning sinn við jafnan rétt kynjanna til að hafa stjórn yfir eigin líkama,“ segir Nanna Hermannsdóttir, ein þeirra átta sem standa á bak við áframhald brjóstabyltingarinnar.

„Þarna verða tónleikar, stutt ræðuhöld, vonandi eitthvað matarkyns og svo verðum við auðvitað með brjóstabolina til sölu,“ bætir Nanna við.

Aðspurð um hvort hún hafi orðið vör við breytingu í kjölfar brjóstabyltingarinnar sem fór af stað þann 25. mars síðastliðinn segist Nanna aldrei hafa ímyndað sér að þetta myndi ná svo langt sem raun ber vitni þegar Adda Þóreyjar Smáradóttir setti inn fyrstu myndina á Twitter.

Segist hún strax hafa fundið fyrir breytingum á viðhorfum. „Það er mikill stuðningur við þetta og ég finn að fólkið sem hélt að þetta væri bara „hæp“ sem myndi deyja út er að skipta um skoðun. Það er auðvitað ekki skrítið að þetta fái svona jákvæða athygli enda er möguleikinn á að fá að vera ber að ofan í sólbaði, í brjóstagjöf eða bara til að skipta um bol á almannafæri eitthvað sem ég held að flestar konur hafa einhvern tímann óskað að væri til staðar.“