Um mikilvægi frjálsra félagasamtaka og sjálfboðaliða

Frjáls félagasamtök eru útbreidd alls staðar í heiminum og fer fjöldi þeirra vaxandi. Þau leika stórt hlutverk í alþjóðlegu starfi, þjónustu við íbúa samfélaga og berjast fyrir málstað og réttindum ýmissa hópa. Þau koma á tengslaneti milli fólks og auðvelda almenningi að vera virkir þátttakendur í lýðræðislegu þjóðfélagi.

Oft á tíðum byggir starfsemi slíkra samtaka á sjálfboðaliðum sem leggja fram störf sín endurgjaldslaust í þágu meðborgara sinna og samfélagsins. Í rannsóknum hefur komið fram að tæpur þriðjungur Íslendinga 18 ára og eldri tók þátt í sjálfboðastörfum 2009-2010 og 75% landsmanna voru í félögum.

Samfélagslegt mikilvægi frjálsra félagasamtaka og sjálfboðaliða

Alþjóðlegar rannsóknir á vegum John Hopkins háskóla sýna fram á að framlag frjálsra félagasamtaka og sjálfboðastarfa skiptir miklu máli sem hlutfall af heildarvinnuafli þjóða og í heildarþjóðarframleiðslu. Íslenskar rannsóknir benda til að umfang og framlag félagasamtaka og sjálfboðastarfa sé mikið og slík samtök vinni ómetanlegt hugsjónastarf til að skapa betra samfélag hér á landi.

Áskoranir og Almannaheill - samtök þriðja geirans.

Félagasamtök standa frammi fyrir mörgum áskorunum og líklegt að hlutverk þeirra í samfélaginu verði enn meira ef marka má þá þróun sem verið hefur í öðrum löndum. Hér á landi hefur stefnumörkun, löggjöf og skattaumhverfi á þessu sviði ekki verið með viðunandi hætti. Almannaheill, regnhlífarsamtök þriðja geirans hafa frá upphafi þrýst á stjórnvöld að bæta þetta umhverfi. Það er því ánægjulegt að leggja á fyrir frumvarp um frjáls félagasamtök á vettvangi almannaheilla á næstkomandi haustþingi.

Fundur fólksins

Samtökin Almannaheill eru einn af aðstandendum Funds fólksins í Vatnsmýrinni og þar verður meðal annars efnt til málþings um mikilvægi frjálsra félagasamtaka í samfélaginu. Fundurinn fer fram í Norræna húsinu þann 12. júní kl. 15-17 og er öllum opinn.

Höfundur er stjórnarkona í Almannaheillum og dósend við félagsráðgjafadeild Háskóla Íslands.