Ábending til borgarstjóra

Í viðtali á Bylgjunni rétt fyrir opinn fund í Tjarnarsal ráðhússins var Dagur B. Eggertsson borgarstjóri spurður um staðsetningu sjúkrahúss við Hringbraut. Svarið var: Eftir samanburð við Keldnaholt og Vífilsstaði voru allir sammála um að Hringbraut væri best. Borgarstjórinn virtist greinilega ekkert vita eða vilja vita af Fossvoginum frekar en fyrrverandi forstjóri og framkvæmdastjóri spítalans, sem stóðu fyrir samanburðinum og sönnuðu í leiðinni að besta staðsetning spítalans væri í Fossvogi. Ég ákvað að mæta á fundinn í ráðhúsinu og láta Dag vita hvar Fossvogurinn væri gæfist tækifæri til þess. Dagur sagði skýrt og vel frá framkvæmdum í borginni. Hann nefndi aðeins spítalann og sagði alla þingmenn hafa verið sammála um Hringbraut. Ég hugsaði: Voru ekki líka allir sammála um að sjá flugvöllinn í friði þar til Rögnunefndin hefði skilað af sér.

Krækt frá þungamiðju

Dagur sagði frá væntanlegri verðlaunasamkeppni um umferðarmiðstöð í Vatnsmýri. Ég velti fyrir mér, hvers vegna krækja frá þungamiðju borgarinnar út í Vatnsmýri, þann stað sem borgaryfirvöld segja eitt verðmætasta byggingaland borgarinnar. Er kostur að hafa umferðarmiðstöð við hlið sjúkrahúss? Var gerður faglegur samanburður við aðra staði? Byggðist valið kannski á því að BSÍ hafði svo lengi verið þarna? Ég velti fyrir mér hvaða aðrir staðir kæmu til greina og þá rifjaðist upp fyrir mér lóð, sem endur fyrir löngu var ráðstafað, en virðist nú á lausu. Gott hvort borgaryfirvöld óskuðu ekki eftir tillögum um nýtingu hennar og forsætisráðherra svaraði með ágætis tillögu, sem sumir töldu aprílgabb. Annars var tillagan ekki svo galin miðað við Hringbraut.

Ég fór að hugsa og komst að þeirri niðurstöðu að vart væri hægt að hugsa sér betri stað fyrir umferðarmiðstöð en á lóð RÚV, sem er á krossgötum við allar helstu umferðaræðar höfuðborgarsvæðisins. Fyrir utan að koma akandi og skipta yfir í almenningssamgöngur er hjóla- og göngufæri í allar áttir. Lóðin er stór og hægt að hafa umferðarmiðstöð og bílastæði neðst og byggja í hæðina verslun, þjónustu, íbúðir og svo auðvitað RÚV efst með loftnetin og skermana uppi á þaki. Það væri hægt að standa þannig að þessu að RÚV fengi út úr lóðinni nægilegt fjármagn fyrir sig + húsnæði til útleigu. Þannig gæti stofnunin orðið sjálfbærari og ekki eins háð skattpeningum frá Jóni og Gunnu.

Í bónus við val á lóð RÚV er hægt byggja mörg hundruð íbúðir í Vatnsmýri. Íbúðir í göngufæri við skóla, miðbæ og væntanlega atvinnustarfssemi í háskólaþorpi. Mér finnst rétt að benda borgarstjóra á að gera faglegan samanburð á hvor staðurinn sé hentugri, áður en farið er af stað með hönnunarsamkeppnina. Ekki liggur eins mikið á umferðarmiðstöð og t.d. spítala, þannig að nægur tími er til að vanda til verka.