Mjög spennt að hita upp fyrir Alt J

„Við erum bara mjög spennt fyrir þessu. Við Jófríður erum léttir aðdáendur, en ég veit ekki alveg með Þórð,“ segir Áslaug Rún Magnúsdóttir í hljómsveitinni Samaris.

„Þetta er svona eitt stærsta upphitunarslot sem við höfum tekið, fyrir utan John Grant og John Hopkins,“ segir hún, en hljómsveitin er stödd í London þessa dagana.

„Við vorum að klára lítinn túr og svo erum við í lok maí að gefa út live-útgáfu af plötunni okkar sem kom út í fyrra. Hún kemur út í takmörkuðu upplagi á vínyl og mun heita Silkidrangar session.“

Fram undan segir hún vera heldur rólegt sumar hjá hljómsveitinni. „Við hitum upp fyrir Alt J og tökum Secret Solstice. Svo ætlum við að byrja að taka upp nýja plötu í júní, en annars bara slaka aðeins á eftir viðburðaríkt ár í fyrra.“ Tónleikar Alt J verða í Vodafone-höllinni 2. júní. -