Komst inn í skóla á Maístjörnunni

?Ég hlakka mikið til að syngja í Hannesarholti með ömmu við hljóðfærið,“? segir Agnes Tanja Thorsteins mezzosópransöngkona glaðlega um tónleika sem hún heldur á sunnudaginn klukkan 16, ásamt ömmu sinni Agnesi Löve píanóleikara.

 Hún kveðst hafa æft prógrammið á fullu síðustu daga eftir að hafa barist við flensu í hálfan mánuð.

?„Ég kom til landsins frá Vín 11. desember, en veiktist þann 12. og var raddlaus fram yfir jól. Þetta er óöryggið sem söngvarar búa við,“? lýsir Agnes Tanja sem er að ljúka BA-námi í Universität für Musik und darstellende Kunst í Vínarborg og hefja mastersnám við sama skóla ? en er í jólafríi núna.

Á efnisskránni í Hannesarholti eru meðal annars verk eftir Fauré, Rachmnaninoff, Händel og Bizet. „?Ég ætla að velja Carmen-aríu, já og eina eftir Mozart,“? segir Agnes Tanja og kveðst vera að fara að takast á við óperuna La clemenza di Tito eftir Mozart, í óperuáfanganum sem hún er í í skólanum. ?„Þar er eitt af stærri mezzosópranhlutverkunum, ef maður getur sungið það þá getur maður í rauninni allt! Svo verð ég líka að taka eitthvað eftir hann Jón Ásgeirsson tónskáld því ég skrifaði BA-ritgerðina um hann og komst inn í skólann á Maístjörnunni hans.?“