Innlent

Styðja forsvarsmenn Landspítalans af heilum hug

Sunna Kristín Hilmarsdóttir skrifar
Landspítalinn.
Landspítalinn. Mynd/Vilhelm
Læknaráð og hjúkrunarráð Landspítala hafa sent frá sér yfirlýsingu þar sem minnt er á að hlutverk Alþingis „og sérstaklega fjárlaganefndar er að tryggja að tekjustofnar ríkisins dugi fyrir sameiginlegri grunnþörf og þjónustu samfélagsins.“

Yfirlýsingin kemur í kjölfar ummæla sem Vigdís Hauksdóttir, formaður fjárlaganefndar, viðhafði í fjölmiðlum um helgina um að forstjóri Landspítalans, Páll Matthíasson, hefði orðið uppvís að andlegu ofbeldi.

 

Páll ritaði pistil á vef Landspítalans síðastliðinni föstudag en þá um morguninn hafði hann farið á fund fjárlaganefndar vegna fjárlaga næsta árs. Sagði Páll að á fundinum hefði hann mætt skilningsleysi og í fréttum Stöðvar 2 á sunnudaginn sagði hann forystu fjárlaganefndar nánast saka stjórnendur spítalans um að vera með stöðugt væl.

Í yfirlýsingu læknaráðs og hjúkrunarráðs spítalans kemur fram að þau styðji af heilum hug „eljusemi forsvarsmanna spítalans til að tyrggja fullnægjandi framlög til rekstrar spítalans í fjárlögum ársins 2016 og minna á að taka verður tillit til fjölgunar í hópi aldraðra og aukinnar þjónustueftirspurnar sem vex að meðaltali um 1,7% á milli ára.“

Þá leggja ráðin tvö jafnframt traust sitt á „að nefndarmenn í fjárlaganefnd og svo Alþingi allt hlutist til um það að fjárveitingar komandi árs tryggi að hægt sé að reka Landspítala í samræmi við þær kröfur og hlutverk sem honum er ætlað.”

Yfirlýsinguna má sjá í heild sinni hér að neðan:

Læknaráð og hjúkrunarráð Landspítala minna á að hlutverk Alþingis og sérstaklega fjárlaganefndar er að tryggja að tekjustofnar ríkisins dugi fyrir sameiginlegri grunnþörf og þjónustu samfélagsins.

Fagleg þjónustaLandspítala, lækningar, hjúkrun, endurhæfing og rannsóknir byggja á því að fjárveitingar dugi fyrir því hlutverki sem þjóðarsjúkrahúsinu er ætlað að gegna. Rekstur Landspítala hefur verið í járnum undanfarin ár og fjármagn til uppbyggingar og endurnýjunar innviða hans naumt skammtað og í mörg ár nánast alveg skorið niður. Á þessu þarf að verða breyting.

Læknaráð oghjúkrunarráð Landspítala styðja af fullum hug eljusemi forsvarsmanna spítalans til að tryggja fullnægjandi framlög til rekstrar spítalans í fjárlögum ársins 2016 og minna á að taka verður tillit til fjölgunar í hópi aldraðra og aukinnar þjónustueftirspurnar sem vex að meðaltali um 1,7% á milli ára. Ekki verður heldur undan því skotist að sinna viðhaldi og endurnýjun á starfsaðstöðu og húsnæði spítalans, sem vanrækt hefur verið um langt árabil vegna fjárskorts. Ekki verður séð að í núverandi frumvarpi að fjárlögum sé gert ráð fyrir þessum mikilvægu liðum með fullnægjandi hætti.  

Fjárveitingar tilinnviða heilbrigðisþjónustunnar á Íslandi, þ.e.a.s. endurnýjunar og viðhalds húsnæðis, tækjakaupa og framþróunar hefur undanfarin ár verið með því allra lægsta sem um getur í OECD löndum. Að meðaltali verja OECD löndin 0,5% af VLF sem á Íslandi samsvarar 10 milljörðum króna ár hvert.  Ef miðað er við Norðurlöndin, t.d. Danmörku, væru um 14 milljarðar eyrnamerktir þessum lið.

 

Íslenskstjórnvöld hafa skv. skýrslu OECD varið sem svarar 0,1% af VLF í fjárfestingar í innviðum heilbrigðisþjónustunnar og eru þar í næst neðsta sæti OECD landanna. Lítil sem engin merki eru um að í dag sé gert ráð fyrir breytingum á þeirri þróun eða framlögum stjórnvalda til málaflokksins. Slíkt er áhyggjuefni og læknaráð og hjúkrunarráð Landspítala hvetja til þess að sú vegferð verði strax tekin til endurskoðunar.

Læknaráð oghjúkrunarráð Landspítala leggja traust sitt á að nefndarmenn í fjárlaganefnd og svo Alþingi allt hlutist til um það að fjárveitingar komandi árs tryggi að hægt sé að reka Landspítala í samræmi við þær kröfur og hlutverk sem honum er ætlað.


Tengdar fréttir

Öll spjót standa nú á Vigdísi

Fyrrverandi þingmaður Framsóknarflokksins segir flokkinn verða að sýna ábyrgð og finna Vigdísi Hauksdóttur annan vettvang en þingið.

Segir Vigdísi beita „skítatrikkum“ á nefndarfundum

„Það er algert hneyksli að þessi kona hafi fengið að vera formaður í valdamestu þingnefnd landsins jafn lengi og raun ber vitni,“ segir Davíð Stefánsson, fyrrverandi varaþingmaður Vinstri grænna.




Fleiri fréttir

Sjá meira


×