Erró og Spessi meðal þeirra sem gefa verk sín á góðgerðaruppboði í kvöld

Við sáum að Fjölskylduhjálp gaf út tilkynningu á dögunum um að þau sæju sér ekki fært að sinna öllum sem til þeirra leita nú um jólin. Okkur var ekki til setunnar boðið,“ segir Hulda Birna Vignisdóttir, ritstjóri nýs miðils, Jahá.is, sem birtir eingöngu jákvætt efni á vef sínum.

Í kvöld kl. 18.00 fer fram góðgerðaruppboð til að styrkja jólaaðstoð Fjölskylduhjálpar Íslands, en er um leið opnunarteiti vefmiðilsins nýja.

Einar Einarsson er annar aðstandandi góðgerðaruppboðsins.

„Við hringdum út alla sem við gátum og höfum fengið aðstoð úr ótrúlegustu áttum. Listamenn hafa gefið okkur verk, menn hafa gefið veitingar og áfengi og ég veit ekki hvað og hvað. Það eru allir að gefa sitt framlag. Svo viljum við bara safna eins miklum pening og við getum fyrir Fjölskylduhjálp í kvöld.“

Meðal uppboðsgripa er áritað plakat frá Erró sem bróðir hans, Ari Trausti, gaf til söfnunarinnar. Þá verða verk boðin upp eftir Spessa og Hjalta Parelíus, svo einhverjir séu nefndir.

Hulda Birna segir hugmyndina að Jahá hafa kviknað fyrir ­nokkrum mánuðum. Hún segir alltof mikið um neikvæðni í samfélaginu. Sjálf hefur hún glímt við kvíða og þunglyndi.

„Mér finnst bara vanta breytingu á hugarfari, jákvæðni og samkennd í sam­félagið. Ég vil leggja mitt af mörkum til þess.”