Varð svo heltekin af því að borða hollan mat að hún þróaði með sér átröskun

Jordan Younger er vel þekktur heilsu-og lífstílsbloggari en hún heldur úti síðunni Blonde Vegan sem nú hefur reyndar yfirskriftina The Balanced Blonde. Ástæðan fyrir nafnabreytingunni er sú staðreynd að Younger þróaði með sér nokkurs konar átröskun þar sem hún varð heltekin af því að borða hreinan og hollan mat.

Átröskunin er kölluð orthorexia nervosa, en heitið var fyrst notað af Dr Steven Bratman árið 1997. Er átröskuninni lýst sem sjúkdómi sem dulbúinn er sem dyggð enda líta flestir svo á að það sé gott að borða hollan mat.

Markmiðið ekki að grennast

Í læknisfræði hefur orthorexía ekki verið formlega skilgreind sem sjúkdómur en hún er frábrugðin þekktum átröskunarsjúkdómum á borð við búlimíu og anorexíu þar sem markmið þeirra sem þjást af orthorexíu er ekki að grennast.

Breska dagblaðið Independent birti viðtal við Younger á vef sínum um helgina þar sem hún lýsir því hvernig þráhyggjan tók yfir líf hennar og mataræði hennar fór að orsaka líkamlega kvilla, þar sem Younger hætti til að mynda að hafa blæðingar.

Þá fékk hún kvíðaköst ef hún þurfti að borða án þess að hafa skipulagt máltíðina fyrirfram en mataræði hennar var afar strangt, ef svo má að orði komast.

Var hrædd við ákveðnar tegundir af mat

„Ég hafði þróað með mér hræðslu við ákveðnar tegundir af mat því ég hafði ekki borðað sumt svo ótrúlega lengi, eins og til dæmis egg,“ segir Younger en hún borðaði til að mynda engar fæðutegundir úr dýraríkinu og ekkert sem innihélt olíu, sykur eða glútein.

Younger segist hafa áttað sig á því að ekki var allt með felldu þar sem henni leið sífellt verr vegna mataræðisins. Hún fór því til sálfræðings og hefur verið að byrjað að egg, fisk og kjúkling á ný. Younger segir að það hafi ekki verið auðvelt að fara aftur í að borða þessar afurði og ekki hafi allir þeir sem lásu bloggið hennar daglega og fylgdu henni á samfélagsmiðlum verið sáttir.

Umfjöllun Independent um orthorexíu má lesa í heild sinni hér.