Þjóðarskömm

Ævilíkur Íslendinga nú eru 82,1 ár samkvæmt nýlegum tölum frá embætti landlæknis. Í nýrri skýrslu frá sama embætti má lesa að miðgildi biðtíma eftir augasteinsaðgerð sé 39 vikur. Heildarfjöldi (fjöldi augna) á biðlista fyrir sömu aðgerð var 3.895 í október 2015.

Aðalástæða augasteinsaðgerðar er ský á augasteini sem veldur verulegri sjónskerðingu og lélegum lífsgæðum. Á Vesturlöndum er ský á augasteini sjúkdómur gamla fólksins og eykst tíðni hans verulega með hækkandi aldri. Um áttrætt er helmingur fólks kominn með sjúkdóminn og í mörgum tilvikum er þá blinda bein afleiðing hans. Lækning felst í skurðaðgerð þar sem augasteinninn er fjarlægður og gerviaugasteinn settur inn í augað í hans stað. Að öllu jöfnu tekur aðgerðin sjálf fimm til tíu mínútur og sjúklingur getur farið heim strax að henni lokinni. Árangur er oftast mjög góður og margir fá fulla sjón á viðgerða auganu. Má með sanni segja að augasteinsaðgerð sé ein best heppnaða aðgerð læknisfræðinnar hvað varðar árangur miðað við kostnað.

Það er Íslendingum til vansæmdar að láta gamla fólkið bíða svona lengi eftir lítilli skurðaðgerð sem getur bætt líf þess svo um munar. Áttræð manneskja á ekki mörg ár eftir og því er ansi nöturlegt til þess að hugsa að hún verði ekki sæmilega sjáandi til æviloka. Við Íslendingar sýnum ekki gamla fólkinu næga virðingu, eins og margar aðrar þjóðir gera, og þetta sem hér að ofan er lýst er ein birtingarmynd þess. Þetta fólk á langa starfsævi að baki og hefur þá greitt sína skatta og gjöld. Fyrir þá sem sífellt eru að býsnast út af kostnaði við heilbrigðisþjónustu má benda á að oft léttir nýja sjónin fólki lífið og öll umönnun verður auðveldari og um leið ódýrari.

Almannatryggingar voru hugsaðar sem ein grunnstoð samfélagins. Nú eru komnir brestir í þessa stoð. Ef þú átt peninga getur þú oft borgað aðgerðina að fullu og stytt þannig biðtímann fyrir sjálfan þig.

Stundum skammast ég mín fyrir að vera Íslendingur.