Drakk óvart malt frá síðustu öld: „Ég hélt ég væri bara svona léleg að blanda“

„Enn sem komið er þá hef ég það ágætt en ég er að búa mig undir hremmingar,“ segir Sara Valgeirsdóttir í samtali við Vísi. Sara afrekaði það í dag að innbyrða afar vafasamt malt en síðasti neysludagur dósarinnar var 13. nóvember 1997 eða fyrir rúmum átján árum.

Aðdragandinn var sá að Sara var á leið í sumarbústað í Grímsnesinu ásamt vinkonum sínum til að læra undir fyrir lokapróf en þær stunda nám við Menntaskólann í Hamrahlíð. Bústaðurinn er í eigu ömmu og afa einnar stelpunnar. Áður en þær fóru í bústaðinn komu þær í verslun þar sem Sara ákvað að kaupa malt og appelsín til að blanda sér.

Í dag blandaði hún síðan malt og appelsín og drakk lungann úr deginum. Það var ekki fyrr en undir kvöld að vinkona hennar kom til hennar og spurði hana hvernig stæði á því að allar maltdósirnar væru óopnaðar ef hún hefði verið að drekka það í allan dag.

„Ég svaraði að ég hefði notað malt úr dós sem hefði verið inn í ísskáp,“ segir Sara. Það var þá sem vinkona hennar setti upp mikinn skelfingarsvip og áttaði sig á því hvað hafði gerst. Dósin sem um ræðir virðist hafa gleymst í bústaðnum fyrir rúmum átján árum og enginn sinnt um að henda henni. Að sögn hafa flestir gestir sumarhússins verið meðvitaðir um tilveru hennar. Það má því gantast með að dósin hafi verið nokkurskonar fjölskyldugripur.

„Þegar ég drakk þetta þá hugsaði ég með mér að það væri nú eitthvað skrítið bragð af þessu en ég hélt bara að ég væri svona ofboðslega léleg að finna réttu hlutföllin,“ segir Sara. Hún lýsir bragðinu sem afar römmu og gerjuðu og síðan „hafi alltaf verið eitthvað viðbjóðslegt gutl sem varð eftir í glasinu.“

„Ég fékk einhvern smá magakrampa áðan og það verður forvitnilegt að sjá hvernig þetta fer. Ég hugsa að næst kaupi ég mér bara tilbúna blöndu í stað þess að reyna að spara nokkrar krónur með að blanda þetta sjálf,“ segir Sara en hún segist vera nokkur hrakfallabálkur. „Það er ekki nokkur vafi á því að þetta hefði ekki getað komið fyrir neinn annan en mig.“