Fær fullar bætur vegna örorku sem hlaust af líkamsræktartæki

Sjóvá og Fljótsdalshérað bera fulla ábyrgð á líkamstjóni sem íþróttakennari á sextugsaldri varð fyrir í líkamsræktarstöð Egilsstaða í ágústmánuði 2010. Í kjölfar slyssins er maðurinn tólf prósent öryrki.

Slysið átti sér stað er maðurinn var að gera æfingu í togvél, svokallaðri „Multi Jungle“ vél, þegar pinni, sem hafði það hlutverk að halda sleða með trissuhjóli tækisins á réttum stað, losnaði. Afleiðingar þess voru að trissuhjólið losnaði og maðurinn slengdist fram og fengið hlíf trissuhjólsins í höfuðið. Höggið kýldi hálshrygg mannsins í mikla beygju sem hefur valdið honum talsverðum óþægindum.

Maðurinn taldi að líkamstjón hans mætti rekja til galla í tækinu en atburður sem þessi hafði átt sér stað þrisvar áður. Í tvígang olli það slysum á fólki. Einnig var byggt á því að Fljótsdalshérað hefði vanrækt það að tryggja öryggi í líkamsræktarstöðinni. Öllum slíkum ásökunum var hafnað af sveitarfélaginu.

Héraðsdómur Austurlands komst að þeirri niðurstöðu að maðurinn skyldi bera helming tjóns síns sjálfur þar sem hann hefði verið meðvitaður um að tækið ætti þetta til ef ekki væri farið rétt að því. Niðurstaða Hæstaréttar var hins vegar að fella bótaábyrgðina alfarið á sveitarfélagið og tryggingarfélag þess. Engin gögn lægu fyrir í málinu sem bentu til þess að notkun mannsins á tækinu hefði verið röng og því ekki tilefni til að fella sök á hann.

Var Sjóvá og Fljótsdalshéraði, líkt og áður segir, því gert að bæta manninum tjón sitt auk þess að greiða honum málskostnað á báðum dómstigum alls tvær milljónir króna.