Góður húmor og menn reyna að vanda sig

„Þetta er mjög skemmtilegt, annars væri maður ekki að þessu, þetta er góður húmor og maður reynir að vanda sig,“ segir tónlistarmaðurinn Bragi Valdimar Skúlason. Hann sendi á dögunum frá sér sína þriðju plötu í samstarfi við Memfismafíuna en platan er í raun barnaplötubók og nefnist Karnivalía.

Um er að ræða bók þar sem í er að finna ellefu laga plötu ásamt söngtextum og litlum hugvekjum og smásögum sem fylgja hverju lagi. „Við ákváðum að gefa þetta út sem bók með plötu til þess að hressa upp á „formattið“ og það er líka auðveldara að senda þetta út í formi bókar þar sem þetta eru stuttar sögur við hvert lag og þá njóta myndirnar sín enn betur,“ segir Bragi Valdimar.

Verkefnið ætti einnig að falla fullorðnum vel í geð og er ekkert síður fyrir þá þar sem textarnir eru hnyttnir og sumt af húmornum þannig að einungis fullorðnir skilja það.

Karnivalía er þriðja platan í barnaplöturöðinni því áður hafa komið út plöturnar Gilligill sem kom út árið 2008 og Diskóeyjan sem kom út árið 2010 og innihélt meðal annars smellinn Það geta ekki allir verið gordjöss.

Bragi Valdimar segir efnið á plötunni fjölbreytt. „Þetta er allt frá diskói og furðu-fönki yfir í vögguvísur.“

Á Karnivalíu syngur fjöldi söngvara en Sigríður Thorlacius, Egill Ólafsson, Sigurður Guðmundsson og Magga Stína eru í stórum hlutverkum. Þingmaðurinn og fönkprófessorinn Óttarr Proppé þylur stafrófsvísur og sjálfur Páll Óskar birtist í sérlega hoppvænu stuðlagi, Húba Húba. Þá segir Jón Gnarr sína meiningu um mannanafnanefnd í samnefndu lagi. Upptökustjórn er í höndum Guðmundar Kristins Jónssonar, sem er betur þekktur sem Kiddi í Hjálmum.