Rannsókn á flugrita sögð styðja kenningar um sprengjuárás

Fjölmiðlar í Frakklandi herma að rannsókn á flugrita farþegaflugvélarinnar KGL9268, sem fórst yfir Sínaískaga fyrir viku, hafi útilokað að bilun í tæknibúnaði eða gáleysi áhafnar hafi orðið til þess að vélin fórst. Sprenging hafi heyrst á upptöku flugritans en ekkert hafi verið að flugmótornum fyrir það.

Þetta hefur LePoint eftir ónafngreindum heimildarmanni innan þess teymis sem rannsakað hefur flugritann. The Independent fjallar einnig um málið. Yfirvöld í Bretlandi og Bandaríkjunum hafa nú í nokkra daga haldið því fram að vélin hafi „líklega“ farist vegna sprengjuárásar. Rússar og Egyptar segja þær yfirlýsingar þó ótímabærar.

224 manns voru um borð í vélinni, sem var á leið frá Sharm el-Sheikh til Pétursborgar. Allir létu lífið. Rússar hafa ákveðið að stöðva allar flugferðir til Egyptalands og Bretar hafa stöðvað allar ferðir til borgarinnar Sharm el-Sheikh.