Þykist taka að sér að skjóta ketti

Heiðar Blomsterberg, gamall maður á Raufarhöfn, auglýsti í Facebook-hópnum Braskarar (sölusíða) að hann tæki að sér að aflífa ketti. Viðbrögðin létu ekki á sér standa.

Skilaboð Heiðars eru svohljóðandi:

„Góðan dag. Ég tek af mér að aflífa gælu dýr. Þá aðalega ketti. Hef aflífað nokkra ketti hérna á Raufarhöfn. Tek þau í skúrinn hjá mér og skýt þá, en allt gert mjög snirtilega og passa að dýrinn kveljist ekki.

Hafið samband í einkaskilaboðum.“

Þessi skilaboð eða auglýsing lagðist verulega illa í margan manninn sem þau sáu, en fólk gat ekki vitað að Heiðar Blomsterberg er svikahrappur, hann finnst ekki í Þjóðskrá og myndir sem hann notar af sér á Facebookvegg eru stolnar af netinu og eru af norskum manni sem heitir Svein Blindheim.

Þessi sérkennilega saga kennir að vegirnir á Facebook geta reynst hálir.

Best væri að berja Heiðar?

Nokkrir reyna að benda Heiðari á að ekki sé heimilt lögum samkvæmt að skjóta gæludýr, nema dýralæknar. En, Heiðar, sem segist vera búsettur á Raufarhöfn, ber sig aumlega segir lausaganga katta bönnuð í Norðurþingi, þar sem hann býr og hann megi alveg skjóta þá.

Í umræðum sem spretta undir þessu erindi Heiðars missa margir þolinmæðina og holskefla svívirðinga hvolfast yfir þennan gamla mann sem kallaður er „ræfill“ og „klikkhaus“. Einn missir þolinmæðina og segir að það þyrfti einhver að taka í Heiðar, hreinlega berja hann, það hljóti að vera til einhver lög sem segja það leyfilegt.

Þetta er þakklætið

Greinilegt er að kattavinirnir eru margir og þeim er ekki skemmt. Heiðar hins vegar gefur sig hvergi og bendir að það megi skjóta gæsir. „Af hverju ekki ketti? Ekki spyrja svona heimskulega.“ Talsverð rekistefna er vegna þessa erindis og Heiðari þykir illa að sér vegið:

„Ég var bara að bjóðast til að hjálpa fólki sem vill losna við kéttina sína! er þetta þakklætið sem maður fær?“

Gamall maður missir aðaláhugamál sitt

En, svo tekur atburðarásin einkennilega vendingu því Heiðar Blomsterberg kemur fram með óvænta tilkynningu degi síðar, svohljóðandi:

„Takk kærlega fyrir facebook!! Það kom til mín maður frá hreppnum og bannaði mér að skjóta kétti! Hann sagði mér að mikið af fólki hefðu hringt í hann og látið hann vita af þessu. Núna megið þið hafa það á samviskunni að gamall maður sé búinn að missa sitt aðal áhugamál og kanski nokkra þúsund kalla.“