Íslenski boltinn

Umfjöllun, viðtöl og einkunnir: Fjölnir - Víkingur 4-3 | Tíu Fjölnismenn héldu út í markaleik

Stefán Árni Pálsson á Fjölnisvellinum skrifar
Davíð Örn Atlason og Viðar Ari Jónsson berjast um boltann.
Davíð Örn Atlason og Viðar Ari Jónsson berjast um boltann. vísir/valli

Fjölnir vann sterkan sigur, 4-3, á Víkingum í Pepsi-deild karla í knattspyrnu í dag. Fjölnismenn voru hálfan leikinn einum manni færri en það skipti ekki máli og sigurinn þeirra.

Leikurinn hófst með miklum látum og var aðeins eitt lið mætt á völlinn á upphafsmínútunum. Það voru Fjölnismenn og þeir keyrðu heldur betur á Víkinga. Með góðu spili og skipulögðum sóknarleik var Fjölnir komið í 3-0 eftir 40 mínútna leik.

Með mörkum frá Kennie Knak Chopart, Bergsveini Ólafssyni og Aroni Sigurðarsyni. Allt stefndi þetta í rúst heimamanna. Algjörlega upp úr þurru skoruðu þeir Ívar Orri og Hallgrímur Mar tvö mörk á síðustu mínútum fyrri hálfleiks og staðan allt í einu orðin 3-2. Ekki nóg með það, þá fékk Gunnar Már Guðmundsson, leikmaður Fjölnis, rautt spjald undir lok hálfleiksins og var útlitið ekki svo slæmt fyrir Víkinga.

Síðari hálfleikurinn byrjaði mikið mun rólegra en sá fyrri og voru leikmenn liðanna ekki að finna taktinn. Það var ekki að sjá að Víkingar voru einum fleiri og Fjölnismenn stóðu vel í þeim. Kennie Knak Chopart var oft á tíðum erfiður Víkingum og fór mjög illa með þá. Víkingar náðu ekki að brjóta ísinn og þegar leið á hálfleikinn voru Fjölnismenn bara líklegri.

Þegar fimm mínútur voru eftir af venjulegum leiktíma fékk Guðmundur Böðvar Guðmundsson boltann rétt fyrir utan vítateig Víkinga og bara lagði hann snyrtilega í netið. Staðan orðin 4-2 og leikurinn í raun búinn, eða hvað?

Víkingar brunuðu strax upp völlinn og Davíð Örn Atlason skoraði ágætt mark og minnkaði muninn niður í eitt mark. Lengra komust gestirnir ekki og unnu Fjölnismenn fínan sigur, 4-3, í mögnuðum markaleik. 

Milos: Viktor kemur til baka

„Þetta var ekki nægilega gott, sérstaklega ekki af okkar hálfu fyrstu þrjátíu mínútur leiksins,“ segir Milos Milojevic , þjálfari Víkinga, eftir leikinn.

„Við fá að óska Fjölnismönnum til hamingju með sigurinn í dag, þeir voru betri aðilinn og áttu skilið að fá þrjú stig.“

Milos segist vera ósáttur með það hvernig Víkingar komu inn í leikinn.

„Varnarleikur liðsins var ekki góður og það er eitthvað sem við verðum að skoða mjög vel. Fótboltalega vorum við ekki nægilega góðir. Menn voru oft út úr stöðu og bara út um allt.“

Viktor Jónsson, framherji Þróttar, fór á kostum í sumar og gerði 19 mörk. Hann er samningsbundinn Víkingum og var á láni hjá Þrótturum.

„Hann er samningsbundinn okkur og er á leiðinni til baka, það er það eina sem ég veit. Hvað verður svo eftir tímabilið á bara eftir að koma í ljós.“

Bergsveinn: Við erum ekkert orðnir saddir

Bergsveinn í leik í sumar.

„Þetta var stórfurðulegur fótboltaleikur hér í dag,“ segir Bergsveinn Ólafsson.

„Þetta hafðist að lokum hjá okkur, með seiglu og vinnusemi. Þvílíkur seinni hálfleikur hjá okkur, allir að vinna fyrir hvorn annan og þannig uppsker maður þrjú stig.“

Bergsveinn segir að liðið hafi haft mikla yfirburði í fyrri hálfleiknum.

„Við fáum á okkur einhver tvö skítamörk sem á ekki að gerast. Heilt yfir vorum við miklu betri í þessum leik.“

Hann segir að þeir hafi verið aular að hleypa þeim inn í leikinn.

„Þetta tímabil hefur verið gott hjá okkur en við erum alls ekkert saddir og ætlum okkur að halda áfram.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.