Lára Rúnars frumsýnir í kvöld

 „Myndbandið fangar það sem gerist þegar maður leyfir einhverjum að komast að kjarnanum sínum, það að þora að treysta. Þær gera þetta afbragðsvel, líkt og allt sem þær gera,“ segir Lára Rúnarsdóttir og á þar við leikkonurnar Guðrúnu Bjarnadóttur og Laufeyju Elíasdóttur, sem fara með hlutverkin í myndbandi við titillag plötunnar Þel sem kom út í vor, og verður frumsýnt í kvöld. „Dögg Mósesdóttir leikstýrði og Hrafn Garðarsson skaut, og ég kem aðeins fyrir í því sjálf.“



Mun Lára sýna myndbandið í Petersen-svítunni í Gamla bíói í kvöld og spilar svo lög af plötunni ásamt hljómsveit sinni, í bland við eldra efni.

 

„Ég er virkilega spennt að fá að spila í þessu sögufræga húsi, en ég hef aldrei gert það áður.“ Herlegheitin hefjast klukkan 21.00 og verður mikið um dýrðir, svo sem bjórkynning á Petersen Lager. 



Fyrir þá sem ekki komast í kvöld, geta þeir hinir sömu haldið ró sinni, því á morgun, föstudag, mun Vísir svifta hulunni af myndbandinu.