„Edrúlífið án djóks snilld“

Helgi Ómars, ljósmyndari og bloggari á Trendnet, segir frá því í einlægum pistli á Trendnet í dag að nú sé komið ár síðan hann hætti að drekka. Hér má lesa pistil Helga í heild sinni. Hann segir að það sé því stór dagur í lífi hans, hann hafi vitað að hann gæti ekki orðið hamingjusamur með áfengi í lífi sínu og finnst „edrúlífið“ snilld.

„Það gerðist ekkert hellað, ég gerði engin mistök eða drakk of mikið. Ég drakk bara og sama sagan endurtók sig. Ég vaknaði í mínus. Vanlíðanin var yfirþyrmandi. Ég gat alveg brosað og svoleiðis, en inní mér var allt í maski.

Ég drakk aldrei sérstaklega illa, ég lenti aldrei í blackout-um eða drakk of mikið (jú ókei það hefur gerst en þið vitið). Ég hafði alltaf vit fyrir því að fá mér vatnsglas ef ég drakk of mikið. Allt var þannig séð í góðu varðandi áfengið, gat alveg hegðað mér eins og vitleysingur eins og hver annar, en það var aldrei neitt kreisí,“ skrifar Helgi.

Engin kvöð að sleppa áfengi

Hann segist hins vegar hafa vitað að hamingjan myndi aldrei verða hans héldi hann áfram að drekka.

„Þennan dag ákvað ég einfaldlega að bera nógu mikla virðingu fyrir tilfinningum mínum til að segja skilið við sopann. Það fyndna við þetta allt saman er að þetta hefur ekki verið nein kvöð, það var svolítið eins og heilinn minn og líkaminn hittust og ákváðu að standa saman. Mér finnst algjör snilld að vera laus við þetta úr lífinu mínu. Lífið var eitthvað miklu hreinna og betra eftir að ég hætti. Það að hætta drekka lagaði þó engin vandamál, en það hjálpaði mér að takast á við vandamálin á miklu skýrari og fallegri máta.“

Þakklæti er Helga efst í huga eftir árið og hann segir „edrúlífið án djóks snilld“ og djammið skemmtilegra ef eitthvað er.

„Ef þið eigið vandamál með áfengi eða eruð komin með alveg nóg af drykkjunni mæli ég eindregið með þessum lífstíl. Við eigum ekki að þurfa vímuefni til að leyfa okkur að dansa og hafa gaman, það á að koma náttúrulega til okkar sem manneskjur.“