Arnór: Barðist við Chelsea um að selja Eið Smára til Man. Utd

Arnór Guðjónsson, einn besti knattspyrnmaður Íslands frá upphafi, var í kempuviðtali í Akraborginni í gær þar sem hann fór yfir ferilinn frá fyrsta sparki á Húsavík til þess síðasta hjá Stjörnunni.

Arnór afrekaði margt á sínum ferli og var kjörinn næst besti knattspyrnumaður Íslandssögunnar á lokahófi sjónvarpsþáttanna Tíu Bestu þar sem fjallað var um þá tíu bestu.

Sonur hans, Eiður Smári Guðjohnsen, var í þriðja sæti í þeirri kosningu sem fram fór árið 2008. Arnór ræddi um soninn í viðtalinu sem hann er augljóslega mjög stoltur af.

„Hvernig hann hefur tekið á hlutum og inn á vellinum er algjör snilld. Það var virkilega sterkt hjá honum að koma til baka 18-19 ára gamall eftir fótbrotið. Hvernig hans ferill tókst á flug í Bretlandi er með ólíkindum,“ sagði Arnór.

„Hann er náttúrlega búinn að vinna marga titla. Það var mikil barátta á sínum tíma þegar það var ljóst að hann færi frá Chelsea. Hann gat valið á milli stórra félaga. Ég gæti nú talað um það í klukkutíma.“

United vildi fá Eið

Eitt af félögunum sem sóttust eftir því að fá Eið Smára þegar hann yfirgaf Chelsea var Manchester United, en Sir Alex Ferguson var hrifinn af honum.

„Manchester United sterkt inn í myndinni, en síðan var það alveg ljóst að Chelsea ætlaði ekki að selja hann til Manchester. Ég átti í smá baráttu við framkvæmdastjóra Chelsea um það. En síðan kemur Barcelona inn í myndina og eftir það var ekki aftur snúið,“ sagði Arnór.

„Mér fannst hann standa sig vel hjá Barcelona því hann kemur inn í þær aðstæður að þjálfarinn segir við Eið að hann þurfi að vera þolinmóður. Hann var að koma inn í meistaralið og þjálfarinn segist ætla láta leikmennina sem fyrir eru spila.“

„Eiður kemur inn á í fyrsta leik og skorar sigurmarkið. Ég held að þegar það var komið fram yfir áramót var Eiður búinn að skora 12-13 mörk og tímabilið bara hálfnað.“

Virtur af Xavi og Puyol

„Ég veit að hann var mjög virtur af leikmönnunum sem spilaði með honum eins og Xavi og Puyol. Þegar Guardiola tekur við er á döfinni að Eiður verði seldur en Guardiola vildi halda honum. Síðan kemur í ljós að þetta er frábært lið og mikil samkeppni og barátta og liðið vinnur hvern leikinn á fætur öðrum,“ sagði Arnór.

Aðspurður um muninn á feðgunum sem knattspyrnumönnum sagði Arnór hlægjandi: „Eini munurinn er sá að ég var miklu betri. Nei, nei. Fyrir mér er hann besti knattspyrnumaður sem við höfum átt,“ sagði Arnór Guðjohnsen.

Allt viðtalið má heyra í spilaranum hér að ofan.