Tilfinninga-Tómas kominn í hvaladrápið

Hörður Magnússon íþróttafréttamaður greindi frá því í dag að sonur hans, Tómas Geir Howser, væri kominn með sumarstarf. „Tómas Geir er byrjaður á fullu í hvalstöðunni í Hvalfirði. Þar verða drengir að mönnum,“ skrifar Hörður og segist stoltur.

Tómas Geir vann sér það til frægðar að fara fyrir liði sínu úr Fjölbrautaskólanum í Garðabæ í Gettu betur – spurningakeppni framhaldsskólanna og standa sig sérlega vel. Einkum var til þess tekið hversu opinn og skemmtilegur Tómas Geir var, hann leyndi hvergi tilfinningum sínum sem gátu sveiflast alveg í takti við það hvernig liðinu gekk.

Í kjölfarið og í virðingarskyni ávann hann sér viðurnefnið Tilfinninga-Tómas, þá ekki síst til aðgreiningar frá öðrum þeim sem bera nafnið Tómas og voru áberandi þá stundina, sem sagt þeim talninga-Tómasi og svo lækna-Tómasi.

En, sé að marka föður hans verður nú unnið í að gera Tómas að manni og fyrirliggjandi að tilfinningasemi er ekki eitthvað sem í hávegum er haft í herbúðum Kristjáns Loftssonar þegar hvalurinn er dreginn til hafnar og brytjaður niður.

Ekki náðist í Tómas við vinnslu þessarar fréttar.