LÖKE-málið: Ekki rétt að víkja Gunnari tímabundið frá störfum

Stefán Eiríksson, þáverandi lögreglustjóri á höfuðborgarsvæðinu, mátti ekki víkja Gunnari Scheving Thorsteinssyni, lögreglumanni, tímabundið frá störfum vegna LÖKE-málsins svokallaða. Gunnar sneri aftur til starfa hjá lögreglunni í mars síðastliðnum.

Þetta er niðurstaða nefndar sem fjallaði um málið á grundvelli 27. greinar laga um réttindi og skyldur opinberra starfsmanna en Vísir hefur álit nefndarinnar undir höndum.

Alls skipuðu þrír nefndina, þau Kristín Benediktsdóttir, formaður hennar, Sonja Ýr Þorbergsdóttir og Helgi Valberg Jensson. Nefndin klofnaði í afstöðu sinni til málsins en Helgi Valberg skilaði séráliti.

Líta verður til eðlis og alvarleika brotanna

Í áliti meirihluta nefndarinnar kemur fram að hún telji að ekki hafi verið grundvöllur til þess að víkja Gunnari úr starfi þrátt fyrir að hann hafi verið grunaður um refsiverða háttsemi.

Segir í álitinu að líta verði til eðllis og alvarleika brotanna eins og þeim er lýst í ákæru en þegar það sé gert leiki verulegur vafi á því að þau uppfylli skilyrði 1. mgr. 68. gr. almennra hegningarlaga. Greinin heimilar að víkja opinberum starfsmanni frá störfum fremji hann refsiverðan verknað, eins og það er orðað í lögunum.

Héraðsdómur Reykjavíkur sýknaði Gunnar af ákæru um að miðla upplýsingum sem áttu að fara leynt til þriðja aðila. Upphaflega var Gunnar einnig ákærður fyrir að hafa flett upp nöfnum 45 kvenna í upplýsingakerfi lögreglunnar, LÖKE, en sá ákæruliður var hins vegar felldur niður.

Fordæmi fyrir lögreglumenn

Í greinargerð sem Gunnar skilaði inn til nefndarinnar sem fjalllað um tímabundna brottvikningu hans úr starfi kemur fram að hann hafi orðið fyrir miklum óþægindum vegna málsins. Þá segir jafnframt þess megi rekja til ósannra og ærumeiðandi ávirðinga þáverandi aðstoðarlögreglustjóra á Suðurnesjum, Öldu Hrannar Jóhannsdóttur, sem er núna aðstoðarlögreglustjóri á höfuðborgarsvæðinu.

Garðar Steinn Ólafsson, lögmaður Gunnars, segir í samtali við Vísi að þetta sé í fyrsta skipti sem úrskurðað sé að ekki hafi verið rétt staðið að tímabundinni brottvikningu lögreglumanns úr starfi.

„Það hafa í raun og veru aldrei verið sett nein lægri mörk hvaða háttsemi nægir ekki til að svipta embætti þannig að ég myndi segja að fordæmið í þessu máli fyrir lögreglumenn sé nokkuð mikið.“

Aðspurður um hvaða skref séu næst fyrir skjólstæðing hans segir Garðar að núna verði farið yfir hversu háar bætur Guunnar mun krefjast frá ríkinu. Náist ekki að semja um þær fyrir utan dómstóla muni málið fara fyrir dóm.