RVK Soundsystem verður RVK Sundsystem

RVK Soundsystem og Joe and the Juice blása til heljarinnar reggíveislu í Laugardalslaug á morgun þar sem mun fara fram almennilegt „sundpartí af gamla skólanum.“

Partíið mun standa frá klukkan 12:00 til 15:00 sem mun eflaust auðvelda þeim að komast fram úr rúminu sem hugsa sér að taka vel á því í kvöld á Secret Solstice.

Þá mun starfsfólk Joe and the Juice einnig selja djúsa við inngang laugarinnar.

RVK Soundsystem ætla að kalla sig RVK Sundsystem en þeir eru hópur 5 plötusnúða og tónlistarmanna, þeirra DJ Elvars, Gnúsa Yones, DJ Kára, Kalla Youze og Arnljóts úr Ojba Rasta. Hópurinn starfar við kynningu reggítónlistar á Íslandi og er markmiðið að efla senu þessarar tónlistar hérlendis sem þeir telja ekki hafa verið sinnt sem skyldi hér á landi.

Heljarinnar dagskrá verður á Secret Solstice á morgun en herlegheitin hefjast með tónleikum Helga Björnssonar klukkan 15:00.

Í kjölfarið stígur Charles Bradley á svið sem hitar upp fyrir hina goðsagnakenndu hljómsveit The Wailers sem áður lék með reggígoðsögninni Bob Marley.

Nánari upplýsingar um sundið má nálgast hér.